Glade båtpendlarar, men ingen lang kø

– Eg bestemte meg for å ta båten straks det vart avklart at BNR skulle starta rute, seier Hildegunn Alver, første passasjer ombord på første turen frå Knarvik måndag morgon.

– Midt i blinken også for oss. Tenk å sleppa busskø i Åsane, seier to av dei første passasjerane frå Frekhaug, Turid Hesjedal og Bjørn Steffen Thorsen.

Også Marie Morken og Johan Myking frå Nordhordland Pendlarforening var på plass på første turen frå Knarvik, med T-skjorter frå 1994 då den førre snøgbåten slutta å gå.

«Eg var ein båtpendlar» stod det på skjortene.

«Hardangerprinsen» frå det private selskapet BNR tok alle pendlarane inn til Bergen heilt i rute. Presis klokka 06.45 la båten til på Nøstet, etter å ha gått frå Knarvik klokka 06.15 og frå Frekhaug nokså nøyaktig kl. 06.20. Og kring åtte minuttar over sju var båten tilbake i Knarvik.

Der kom det ombord ni passasjerar, det same som på første turen. På første turen kom det med seks passasjerar på Frekhaug, pluss at ordførar Nils Marton Aadland kom ombord med blomsterbukett til adm.dir. Trygve Tønnessen.

BNR sin styreleiar Helge Skår var med på første turen frå Nøstes. Han seier at ein vil følgja med passasjertal og økonomi for den nye ruta, samstundes som ein vil jobba for å få ein kortavtale med Skyss for å kombinera bått og buss.

BNR har og kjøpt både grunnen og det nedfalls venteskuret i Knarvik, for å setja det i stand til bruk for båtpassasjerane.