Gledestårer etter NM-innsats

? Eg veit ikkje heilt kva som skjedde. Eg tek ikkje vanlegvis så lett til tårene, seier ein glad basstrombonist etter premieutdelinga i Grieghallen laurdag.
Presset er enormt når det står ein frå kvart korps på scena framfor ein fullsett Grieghall og resultata vert lesne opp. Det er ikkje lett å halda tilbake kjensler i ein slik situasjon.

Nøgd med andreplass
Camilla Søderstrøm Tveit var også nøgd med at Manger Musikklag kom på andreplass, sjølv om ho ikkje var hundre prosent nøgd med korpset si framføring av plikt- og sjølvvald nummer. Stavanger Brass Band vann med berre eit halvt poeng framfor Manger Musikklag. Det vert dermed Stavanger som skal representera Noreg i EM neste år.
Favorittane før NM og noregsmeistrar i fjor, Eikanger Bjørsvik Musikklag, kom på tredjeplass.

Satsar på EM
? Det er klart me er skuffa, seier Christian Lura, leiar i EBML.  ? Men no må me berre fokusera på deltakinga i EM i april. Vinn me der vert me automatisk kvalifiserte til EM neste år, smiler han.
EBML var godt nøgde med framføringane sine. Det er lite å gjera med at dommarane føretrekk andre tolkingar, seier Lura.

Nytt stykke
Manger Musikklag spela eit heilt nytt stykke, «Cantigas», som vart skrive til MML av Torstein Aagaard-Nilsen og urframført førre søndag. Aagaard-Nilsen var oppglødd etter framføringa i Grieghallen, og kom og fram på scena og gratulerte korpset.
? Det er fantastisk når ein kan ha slike ambassadørar som framfører musikken sin, seier komponisten til Strilen etter framføringa.
Han seier at han tok omsyn til besetninga i MML då han skreiv stykket. Når han til dømes visste at Camilla Søderstrøm Tveit skulle spela basstrombone i MML frå i fjor haust av, la han inn ein krevjande og flott basstrombonesolo i stykket. Tveit vann og solistprisen etter den solistinnsatsen.

Brødreduell
MML sin nye dirigent, Dr. Robert Childs, var godt nøgd med innsatsen til korpset og ikkje minst med det sjølvvalde stykket «Cantigas» av Aagaard-Nilsen.
? Eg var litt skeptisk i starten, då eg høyrde at stykket starta med ni minuttar med roleg musikk. I konkurransar kan det vera vanskeleg. Men det fungerte veldig bra, seier ein svett, men glad Childs.
Han forklarar at det er tøft arbeid å vera dirigent for ein av Aagaard-Nilsen sine komposisjonar, då det er mange rytme- og taktendringar.
Robert er og broren til EBML-dirigent Nicholas Childs.
? Korleis er det å konkurrera med broren din?
? Det er me vane med. Han er min beste ven. Eg var ein av dei første til å gratulera han etter den flotte framføringa til EBML, og han var ein av dei første til å gratulera meg, smiler Robert Childs.

Radøy skuffa
Radøy Brass kom på 8. plass i 1. divisjon
? Me har brukt å koma i alle fall blant dei fem beste, så det er klart me er skuffa over denne plasseringa, seier Kjartan Sylta.
Korpset har og vunne divisjonen tidlegare. Sylta meiner at korpset i år er betre enn i fjor, og dei har og gjort det bra i Siddis Brass. Dei var ikkje hundre prosent nøgde med spelinga, men 8. plass var likevel i underkant av kva dei hadde venta.
 

Ikkje nøgd med plasseringa
? Ein av dommarane skriv også at han ikkje likte stykket. Me hadde difor ikkje hatt noko imot at alle korpsa spelte eit pliktnummer, slik at det var lettare å samanlikna korpsa, seier han.
Oster Brass kom på 9. plass i 1. divisjon.
? Me er nøgde med spelinga, men sjølvsagt ikkje med plasseringa. Vårt mål er å hevda oss i øvste halvdel av divisjonen, seier Birthe Kråkenes i Oster Brass.
Dei hadde vald eit vanskeleg stykke med utfordringar i alle instrumentgrupper. Dette var viktig for utviklinga av korpset, fortel Kråkenes.

Resultat:

Elitedivisjon:

1. Stavanger Brass Band, dir. Russell Gray, poeng: 98+95/96.5

2. Manger Musikklag, dir. Robert Childs, poeng: 94+98/96

3. Eikanger-Bjørsvik Musikklag, dir. Nicholas J. Childs, poeng. 92+96/94

4. Oslofjord Brass, dir. Michael Antrobus, poeng: 96+87/91.5

5. Molde Brass Band, dir. Garry E. Cutt, poeng: 90+91/90.5

6. Sandefjord Brass Symposium, dir. Ray Farr, poeng: 89+90/89.5

7. Ila Brass Band, dir. Trond Korsgård, poeng: 88+90/89

8. Tertnes Brass, dir. Bjørn Breistein, poeng: 93+84/88.5

9. Krohnengen Brass Band, dir. Allan Withington, poeng: 85+92/88.5

10. Jaren Hornmusikkforening, dir: Helge Haukås, poeng: 87+86/86.5

Beste solist: Basstrombone, Manger Musikklag

Beste gruppe: Slagverk, Manger Musikklag

1. divisjon

1. Tomra Brass Band, dir. Frans Violet, poeng: 95

2. Oslo Brassband, dir. Michael Antrobus, poeng: 94

3. Kleppe Musikklag, dir. Eirik Gjerdevik, poeng: 92

4. Sola Brass Band, dir. Rune Gundersen, poeng: 91

5. Alexander Brass Band, dir. Morten E. Hansen, poeng: 90

6. Askøy Brass Band, dir. Helge Haukås, poeng: 89

7. Haukås Musikklag, dir. Thor-Arne Pedersen, poeng: 88

8. Radøy Brass, dir. Gareth Pritchard, poeng: 87

9. Oster Brass, dir. Reid Gilje, poeng: 85

10. Brøttum Brass, dir. Thorbjørn Lunde, poeng: 84

11. Tromsø Brass, dir. Robert Jensen, poeng: 82

12. Vennesla Kristne Brass, dir. David Tellefsen, poeng: 80

3. divisjon:

Austrheim/Lindås Musikklag kom på 9. plass i 3. divisjon med 87 poeng. Dirigent var Pål Magne Austnes. Vinnar i denne divisjonen var Jølster Musikklag, som vann med 98 poeng.

? Me var strålande nøgde både med spelinga og oppkøyringa til NM, men ikkje med plasseringa. Men det var kjekt for det, seier Nordis Helene Holmås.