Gode dagar i oppdrett

? Prisane ligg no på mellom 35 og 37 kroner kg, og det er høgt. Det er klart at dette er positivt for oss, seier Ola Braanaas i Firda Mangement AS. Selskapet er ein av dei største aktørane innan lakseoppdrett i regionen.

Mogleg rekordår
Braanaas ser ikkje vekk frå at 2006 kan koma til å verta eit år på høgde med rekordåret 2000. Då var lakseprisen oppe i 41 kroner per kg på det høgaste.
? Denne utviklinga er likevel ikkje uventa. Me har forutsett dette i to år, seier Braanaas.
Men samstundes åtvarar Braanaas mot trua på at prisane skal halda seg høge. Dei er vane med store svingingar i denne bransjen. Det som medverkar til dei høge prisane no er at det er mange som vil ha laks til påske i EU-landa. I tillegg fører frykt for fugleinfluensa til at ein et mindre kylling i EU-landa. Braanaas viser til at kyllingforbruket i Italia er redusert med 80 prosent, og 25 prosent i Frankrike. Mange erstattar kylling med laks, då dei vil ha trygg og sunn mat, fortel oppdrettaren.

Tener pengar
Dei lokale oppdrettarane som har mykje laks å selja tener altså gode pengar for tida. Braanaas meiner dette er svært viktig for mange oppdrettarar, då prisane har vore låge i periodar dei siste åra.
Enkelte meiner og at dersom Russland opnar opp for import av fersk laks frå Noreg att, vil dette auka prisane endå meir. Braanaas trur ikkje lakseprisen kjem til å stiga så svært mykje som følgje av dette, då det og handlar om kva russarane har evne og vilje til å betala.
Prisane vil og verta påverka av kor mykje laks som vert produsert. Men han skulle gjerne ha sett at konsumentane var villige til å betala meir for laksen, då det handlar om sunn og god mat.


Men og permitteringar
 Medan fiskeoppdrettarane har gode tider, slit foredlingsverksemdene i heile Europa på grunn av høge råvareprisar. I Bøvågen er det permitteringar på gang hjå SMP Marine Produkter, og dei tilsette arbeider no berre tre dagar i veka.
? Råvareprisen har gått til himmels den siste tida, og det er sjølvsagt negativt for foredlingsverksemdene, seier Erling Bjarke i SMP.
Han seier at det for tida går mykje laks frå norske oppdrettarar til EU-landa, der prisane er svært gode for tida. I tillegg spelar nok fugleinfluensaen ei stor rolle, meiner han.
? I enkelte land er forbruket av kylling redusert kraftig på grunn av fugleinfluensaen. Dette vert av mange erstatta med laks. Når det i tillegg snart er påske, då etterspørselen etter laks alltid er stor i Europa, vert prisane høge, seier Bjarke.