Grønt lys for barnehage på Moldekleiv

? Går alt i orden, vert det oppstart 22. mai. Med fem månaders byggjetid kan barnehagen innflyttast i slutten av oktober, seier Jarle Nilsen i Barnebygg.
Barnehagen på Moldekleiv vert den første selskapet reiser i Nordhordland. Barnebygg driv etter ein modell der selskapet både byggjer, eig og driv barnehagane. Modellen føreset ingen innskot frå foreldra.
? Det er særleg dei siste vekene innmeldinga av born har vore så god at me ser grunnlag for å satsa. No er 50 prosent av kapasiteten i dei fire avdelingane dekka inn. Det inneber at me i alle høve har 45 påmelde born. Men dette talet vil truleg stiga litt ettersom me har fleire skjema ute som ikkje har kome i retur, seier Nilsen.
Han gå og ut frå at fleire vil melda si interesse når det no er endeleg klart at det vert bygging.
? Det siste eg gjorde før eg reista frå jobb i dag, var å senda melding til barnehagekonsulenten i Meland om at me går i gang. Meldinga tilbake kom ganske kjapt. Den var «JIPPI»! med store bokstavar, fortel Nilsen.
Den nye barnehagen kjem mellom skulen og den nye ballbingen på Moldekleiv, og vert på to etasjar. Med uteanlegg og parkeringsplass er nybygget kalkulert til 13 millionar kroner.