Grønt lys for ny Gulen-veg

? Det skal verta godt å kunna kom fram til tunet på skikkeleg vis, seier Frode Brosvik til Strilen.

Ungdommen planlegg å busetja seg på den fråflytte garden på Kyrkjeøy, vest for Rutledal i Gulen. Lenge såg det ut for at styresmaktene skulle leggja hindringar i vegen for dette. Fylkesmannen i Sogn og Fjordane la ned motsegn mot reguleringsplanen for vegen fordi han meinte vegen ville føra til for store naturinngrep. Kommunestyret i Gulen heldt oppe si godkjenning av planen i september i fjor, og dermed hamna saka i Miljøverndepartementet.

Positivt

Departementet legg vekt på at busetnad på Kyrkjeøy er positivt av omsyn til å ta vare på det gamle kulturlandskapet der. Sjølv om den 1,7 kilometer lange vegen vil føra til litt inngrep i naturen, meiner departementet at det kan forsvarast.

Det vert også vist til at vegen ikkje går ut til dei ytre delane av Rutletangane, som er dei mest verdfulle frå eit miljøsynspunkt.

På skule

Frode Brosvik er busett i Breidvik i Gulen, men går for tida på boreteknisk fagskule i Bergen. Der skal han vera i to år. Etter det reknar han med å halda fram med å jobba i Nordsjøen.

Kor tid det vert aktuelt å busetja seg på Kyrkjeøy, veit han ikkje i dag. Men no er i alle fall hindringane mot å byggja veg fram til husa på Kyrkjeøy borte, og det gler han seg over.