Grønt lys for Stevnebø på Ikenberget

Vedtaket kom i eit «hastemøte» kl. 08.00 i går, etter at ordførar Tove Linnea Brandvik og ein representant frå utbyggjaren møtte det meste av planutvalet kvelden før.
? Leiaren i utvalet, Kjartan Nyhammer, må ha vorte utsett for eit indirekte press for å ta saka oppatt og gje ein dispensasjon, sa Ståle Hauge i Ikenberget vel etter møtet.
Både han, Atle Gunnarson, Trond Øystein Heradstveit og Ole Fredrik Skulstad gjekk til frontalangrep mot Nyhammer og andre i planutvalet kort etter det 40 minuttar lange møtet.

«Grei dialog»
? De skyt dykk sjølve i foten med dette vedtaket, sa Hauge til Terje Aarvik. Den vurderinga delte ikkje Aarvik, som argumenterte for at bebuarane sine interesser vert betre ivaretekne med det nye vedtaket enn tidlegare. Aarvik seier at han ikkje deler Strilen sin bruk av uttrykket «heftig krangel» på nettsida like etter møtet.
? Eg føler eg har ein grei dialog med folk på Ikenberget. Ein kunne risikert gjennomkøyring. No kan ein få ei mellombels og betre løysing, seier Aarvik. Vegen han fekk fleirtal for dersom ikkje andre løysingar vert funne, kan koma på nedsida av den etablerte røyrleggjarbedrifta Stendal VVS, parallelt med dagens veg i bustadfeltet.  Det vert ei kort strekning inn mot næringsområdet, ei kompromissløysing alle partar må kunna leva med, argumenterte Aarvik.

? Skuffa
? Det er klart me er skuffa etter møtet, seier Atle Gunnarson i Ikenberget Vel. Han synest det er greitt å kalla debatten etter møtet ein krangel.
For nøyaktig 14 dagar sidan la eit klart fleirtal i det same plan-utvalet ned byggje- og delingsforbod i området der grunnarbeida til Byggkjøp-anlegget pågjekk for fullt. Vedtaket seier at «Det vert snarast sett ned ei arbeidsgruppe som skal jobba med trafikkavviklinga til/frå næringsarealet på Ikenberget».
I gruppa skulle vera med folk frå planutvalet, administrasjonen, Lindås tomteselskap, grunneigarane, Ikenberget velforening og vegvesenet. Før utvalet har hatt sitt første møte, går planutvalet tilbake på byggjestoppen og gjev dispensasjon. Men utvalet skal framleis setjast ned, og planutvalet skal oppdaterast i framdrifta med å finna ei betre trafikkløysing.
Vedtaket i går vart gjort mot Frp sine to røyster, Øystein Moldeklev og Bjarte Vatnøy.

? Verta påverka
? Me kan ikkje finna oss i å verta påverka av at det kan verta ei rettssak. Eg har problem med å hoppa og spretta frå tue til tue, sa Moldeklev.
Leiar Kjartan Nyhammer meinte likevel det var rett å oppheva byggjestoppen etter møtet der ordførar og utbyggjar hadde vore med kvelden før.
? Der var det ei felles forståing for kva som bør gjerast vidare, sa Nyhammer.
Vedtaket som fekk fleirtal, legg også opp til å starta opp med ei reguleringsendring for eit litt større område. Eit punkt seier at det hastar med å få på plass ei ny trafikkløysing.
Dersom ikkje betre vegløysingar vert funne, skal det lagast ein ny mellombels veg, som Aarvik gjorde framlegg om, og som er omtalt ovanfor.

«Gå ikkje til pressa»
? På møtet tysdag kveld gav utvalsleiar Kjartan Nyhammer klar melding til oss om at det, for samarbeidsklimaet sin del, var ønskjeleg at lokalpressa ikkje fekk vita om møtet som planutvalet skulle ha, sa Ole Fredrik Skulstad og Atle Gunnarson i Ikenberget Vel.
? Når Ikenberget vel sine utsendingar hevdar at lokalpressa ikkje måtte få vita om dette møtet, er dette feilsitering. Det eg bad om, var at denne saka ikkje vert haussa endå meir opp gjennom t.d. lesarinnlegg, seier Nyhammer.
Atle Gunnarson seier i etterkant at Strilen må ha feiloppfatta etter møtet. Men det er rett at Nyhammer bed Ikenberget vel ikkje føra nokon debatt i lokalavisene.
Nyhammer vedgår etter møtet at kjemien til folk på Ikenberget ikkje er særleg god etter opphevinga av byggjeforbodet.