«Grunnlag for snøggbåt»

– 80 prosent av befolkninga i Meland, Lindås og Radøy seier at dei vil benytta seg av eit slikt tilbod, går det fram av ein rapport selskapet Synovate har utarbeidd for Hordaland fylkeskommune

I følgje rapporten vil 51 pro­sent av dei spurte velja båten framfor privatbil. 47 prosent svarer at dei vil velja båten framfor buss.Reisetida er estimert til 30-35 minuttar.Rapporten skal drøftast nærare i samferdselsutvalet 5. oktober, og i fylkesutvalet 13. oktober.

Saka vert lagt fram for politikarane utan tilråding frå fylkesrådmannen.

Prisen viktig

Det var i juli i år Skyss inngjekk kontrakt om å få gjort marknadsundersøkinga som no er klar. Rapporten er basert på telefonintervju av eit utval av innbyggjarar over 18 år i dei tre kommunane.

Totalt er det gjort 502 intervju.

Svara viser, naturleg nok, at prisen er avgjerande for interessa for å bruka båt i staden for privatbil eller buss.Mellom Knarvik og Bergen vil truleg berre 38 prosent av dei spurde vera villige til å betala ein billett på 94 kroner.

Går prisen ned i 34 kroner, aukar prosenten til 65.På Frekhaug-Bergen vil truleg berre 18 prosent ta båten om billetten er såpass dyr som 94 kroner, mot 28 prosent ved ein pris på 34 kroner.

Må gå ofte

Av svara har Synovate koma fram til fire viktige vilkår for at folk verkeleg vil bruka eit tilbod om snøggbåt. Det er at båten går fram til kl. 18.00 på kvardagar, at avgangane er hyppige, at båten går til Strandkaien og at det er god parkering i Knarvik og på Frekhaug.

For 4 av 5 er det viktig at båten har felles billettsystem med bussane som Skyss organiserer. Men ein av fem seier at dei uansett vil nytta snøggbåten.

Heile artikkelen kan du lesa i Strilen laurdag.