Gulingar kan få skatt på hus og hytter

Bakgrunnen er at det har kome ei lovendring som opnar for at det kan innførast eigedomsskatt på hus og hytter også utanfor tettbygde strøk. Det kan det ikkje i dag.
I dag har kommunen eigedomsskatt på verk og bruk, det vil seia industrianlegg og andre næringseigedommar.

Same reglar
Ordførar Trude Brosvik (KrF) antyda tidlegare i år at det ville koma ei sak om innføring av skatt på hus og hytter, fordi dette kan verta ei kjærkomen inntektskjelde for kommunen. Då sa ho at der måtte vera eit botnfrådrag på bustadhus, slik at den nye skatten ikkje skulle slå uheldig ut sosialt. Men i lova vert det presisert at det ikkje kan vera andre reglar for botnfrådrag på hytter som på hus.

Tre millionar
I Gulen er det no 979 bustader og 707 fritidshus som kan koma inn under lova. Viss eigedomsskatten vert i gjennomsnitt 2000 kroner per eining, vil det gje kommunen nye inntekter på nesten 3,4 millionar kroner i året.
Ordninga kan tidlegast innførast i 2008.
Jordbrukseigedommar og statlege eigedommar kjem ikkje inn under lova.
Saka vert lagd fram utan tilråding frå administrasjonen.