Gutar stal og omlakkerte bil

? Det er ganske utruleg at så unge gutar er med på slikt, seier politiførstebetjent Ove Hindenes ved Lindås og Meland lensmannskontor, etter at to gutar på 13 og 14 år frå distriktet vart tekne for biltjuveri i helga. Saman med ein syttenåring frå Bergen braut dei seg inn på området til Isdalstø Auto i Knarvik fredag kveld.Dette gjorde dei ved å klippa opp nettinggjerdet ved sida av porten. Inne på området fann dei ein bil der startnøkkelen låg i askebegeret. Bilen starta dei så, køyrde han ut gjennom opninga i gjerdet og til Frekhaug.

Lakkera om
Dei køyrde bilen til eit nedlagt fabrikkområde, der dei prøvde å lakkera bilen om frå blå til svart med spraymaling dei hadde skaffa seg. Men dei hadde ikkje nok lakk til å lakkera heile bilen. Så tok dei seg ein tur rundt på Frekhaug, og bilturen enda i ei vegskråning ved Dalevatnet på Sagstad. - Me fekk melding om bilen rundt halv eitt om natta. Då me rykte ut, trefte me ungdommane gåande langs vegen, fortel Hindenes. Dei har vedgått at det er dei som står bak tjuveriet.

Byta skilt
- Me spurde dei om dei ikkje var klar over at stolne bilar vert etterlyste med skilt. Då svara dei at dei hadde tenkt å la bilen stå nokre dagar. Så skulle dei prøva å få prøveskilt på han, seier Hindenes. Han er noko forskrekka over at så unge gutar planlegg noko slikt, for det er tydleg at det ligg ei viss planlegging bak. Den eldste guten skal også ha vore innblanda i liknande tilhøve tidlegare. - Men dei er vel for unge til å forstå rekkevidda av det dei gjer, seier Hindenes. Både 17-åringen og 14-åringen skal ha køyrt bilen. Saka vert no etterforska. For dei to yngste gutane vert det ei sak for barnevernet.

Forskrekka
Då Strilen var innom Isdalstø Auto i går ettermiddag, var bilen alt lakkert tilbake til sin opphavelege farge. - Han tilhøyrer ei eldre dame på Radøy, og ho vart ganske forskrekka då politiet ringde henne natt til laurdag, seier Gustav Eide, innehavar av Isdalstø Auto, til Strilen. Dama er for tida på ferie i utlandet.

Lettkledde
Inne i bilen fann dei verkstadtilsette to bilde av lettkledde damer og eit sportsratt. - Dette er neppe noko som var i bilen før tjuveriet, seier Eide.Heldigvis har bilen nesten ikkje fått skadar i utforkøyringa, berre nokre skrammer på skjermen. - Men då me henta bilen, stod han så på vippen at det berre skulle litt til før at han gjekk rundt, seier Eide. Dei unge biltjuvane har difor hatt flaks at det ikkje gjekk verre. Når det gjeld nøkkelen som tjuvane fann i askebegeret, er det noko som verkstaden ikkje var klar over.   - Det er nok reservenøklar som eigaren har lagt der, seier Eide.