Hærverk på Frekhaug

Politiet fekk i natt melding om at fire ungdommar gjekk rundt og snoka ved parkerte bilar på Frekhaug, mellom anna sjekka dei om alle dørene var låste. Dei rusa ungdommane var også ein runde nede ved omsorgsbustadane.
På venteskuret ved bussterminalen knuste ungdommane alle glasrutene, og la att nokre ølflasker før dei for vidare.
? Ein patrulje var ute på Frekhaug og såg etter ungdommane, men då hadde dei reist frå staden, seier politibetjent Geir Atle Hindenes ved Lindås og Meland lensmannskontor.
Politiet har likevel ein viss peiling på kven ein eller fleire av ungdommane er.

Ringte på
Politiet fekk litt seinare på natta melding frå bebuarane i eit husvære i Fosseskarvegen på Frekhaug, om at ein mann utan stans ringte på hjå dei. Om dette har samanheng med hærverket ved bussterminalen er ikkje sikkert, politiet rykkte ikkje ut til dette huset.

Bilinnbrot
Også på Ikenberget og i Alvermarka var det ulovleg aktivitet natt til tysdag. Kring klokka 03.30 registerte ein bileigar på Ikenberget at uvedkomande tok seg inn i ein bil som var parkert tett i husveggen. Desse to stakk frå staden då dei såg at dei var oppdaga. Tjuvane fekk ikkje med seg noko her.
Biltjuveriet i Alvermarka gav derimot uttelling, her har tjuvane fått med seg eit stereoanlegg.