Hærverk stoppa asfaltering

Maskina stod parkert i ei busslomme i helga. Då fem mann frå Mesta, tre lastebilsjåførar og tre frå Securitas kom på jobb tysdag morgon, hadde nokon klipt av nokre leidningar og knust eller trykt inn to vindauge på anleggsmaskina. Dermed stoppa anleggsarbeidet opp i fire timar før dei fekk reparert maskina såpass at dei kunne bruka henne.
Det er sjeldan at det vert gjort så omfattande hærverk på ei anleggsmaskin, seier Kjell Høyseter i Mesta.
? Sist eg opplevde dette var for mange år sidan. Også det var i Austrheim, seier Høyseter.
Planen var å leggja asfalt på Bakkøy tysdag, før dei skulle vidare og leggja asfalt på Fonnes på ettermiddagen tysdag og i går. Torsdag var planen at dei skulle leggja asfalt forbi Lyseknappen på Radøy.
? Det er heilt forferdeleg at nokon kan halda på slik, seier Høyseter.
Folk frå Austrheim lensmannskontor var på staden tysdag morgon. Dei har førebels ingen mistenkte i saka, men ønskjer gjerne tips frå publikum. Det kan til dømes vera at nokon som har køyrd forbi i tidsrommet frå fredag kveld til tysdag morgon kan ha sett nokon ved maskina.