Hall tilrådd mot ei røyst

? Planen er å dunka prosjektet gjennom i kommunestyret 29. juni. Sidan Vilgerd Storset Husa gjekk i mot i formannskapet, kan det jo henda andre i partiet og er mot. Men eg reknar med klart fleirtal for å gje grønt lys, seier Walderhaug etter at saka vart behandla i formannskapet måndag.
Det er tilrådd å leggja til grunn tilbodet frå Bergensfirmaet Sognnes Bygg A/S på om lag 18,5 millionar. I tillegg er tatt med 500.000 kroner til tribune, same sum til veg, ein million til inventar og ein reserve på ein million.
Med moms og byggjelånsrente er totalsummen oppe i 23,5 millionar kroner. Av dette vil spelemidlane dekka vel fem millionar kroner. Kommunen sin del vert om lag 14 millionar kroner. Av dette vert 7,7 millionar tatt frå kraftfondet og 6,2 millionar skal lånast.

Grundig planlagt
? Er du redd overskridingar?
? Nei. Ein skal aldri seia aldri, men dette er vel det prosjektet i kommunen som har vore grundigast planlagt. Arbeidsgruppa og sekretær Gisle Handeland har gjort ein svært grundig jobb.
Arbeidsgruppa har jobba over lang tid som pådrivar for hallen.
? Eg høyrer til dei som føler seg sikre på at hallen vil bety mykje for auka trivsel på Fedje, seier Walderhaug. Han reknar med at hallen kan opnast i august 2007.
Årlege driftsutgifter er rekna til ein halv million kroner. Etter tilråding frå arbeidsgruppa skal det utarbeidast ei ordning for brukarbetaling. Det skal og opprettast eige styre for hallen, seinast ved årsskiftet 2006/2007.
? Eg synest det er fantastisk at me no er så langt. For plangruppa sin del er me heilt i rute etter målet me sette oss sommaren 2004, seier Gisle Handeland, som har vore med i utvalet frå administrasjonen. Politiske kommentarar ønskjer han ikkje å gje.


? ikkje bakstreversk!
? Nei, eg føler meg på ingen måte bakstreversk! seier Vilgerd Storseth Husa (biletet) når ho vert beden om å kommentera at ho rår frå bygging av fleirbrukshallen.
Husa seier at ho ikkje fekk gehør i formannskapet for å utsetja saka for å klargjera driftsinntektene meir enn det fleirtalet gjer.
? Utgiftene er klare, men inntektene og brukarinnsatsen er for vag og svevande i tilrådinga, seier Husa.
Ho reknar med at heile gruppa på fire vil ha den same haldninga når saka kjem opp i kommunestyret 29. juni.
Grunnen er at saka var drøfta i partiet i forkant av formannskapet sitt møte.
? Vår innstilling er i tråd med programmet me gjekk til val på. Det seier at ein støttar kulturhus så sant ein framleis kan makta dei lovpålagde oppgåvene og at driftsgrunnlaget er klarlagt på førehand, seier Husa. Ho presiserer at ein hall er positivt så lenge kommunen har råd til å drifta han.
? Det står att å sjå om det er nok å drifta hallen med 500.000 i året, seier Husa.