Håp for kvikksølvheving

Tysdag skal det vera høyring i Energi og miljøkomiteen om saka. Skal ein klara å omgjera vedtaket i regjeringa om tildekking, må regjeringa anten ombestemma seg, eller at Stortinget pålegg regjeringa om å omgjera vedtaket. Skal det siste skje, må nokon stortingsrepresentantar røysta mot si eiga regjering, då regjeringspartia har fleirtal på Stortinget. Strilen undersøkte om dette var sannsynleg like etter vedtaket i regjeringa for nokre veker sidan, og då såg det ut til at det ikkje kom til å skje. Sentrale politikarar for SV, Ap og Sp sa då at dei støtta vedtaket om tildekking, då det vart for usikkert å prøva å fjerna kvikksølvet, og at det var oppslutnad om dette i regjeringspartia.
Dei nye opplysingane frå Kjelstrup i saka kan gjera at dette endrar seg, og kan vera det som skal til for at stortingsrepresentantar frå regjeringspartia bryt ut og bed om ny gjennomgang. Til NRK Hordaland sa stortingsrepresentant Ågot Valle (SV) i går, at høyringa førstkomande tysdag gjev nytt høve til å revurdera kva som er den beste miljømessige løysinga. Ho sa og at ein må gjera det ein kan for å finna midtpartiet av ubåten. Det knyter seg no difor stor spenning til kva som skjer med saka framover, og til kva som kjem fram under høyringa på tysdag.