Håpar å rydda opp til påske

Det seier aksjonsleiar Gunvald Isaksen i Interkommunalt utval mot akutt forureining (IUA). Det er dei som har ansvar for land- og strandaksjonen etter Server-forliset.

Startar strandreinsing
Målet er å verta ferdige før trekkfuglane kjem til desse områda, og før turistar og hyttefolk strøymer til Nordhordland. IUA hadde søndag 135 mann i sving med oppryddinga ulike stader etter Server-forliset. Dei aller fleste av desse er mannskap frå kommunar og brannvesen.
? Eg er veldig godt nøgd med den jobben desse mannskapa gjer, seier Isaksen.
Denne veka starta arbeidet i fjøra for fullt, med raking, spyling av berg og liknande. Isaksen seier det no er lite olje som flyt i sjøen.
På Fedje var det søndag 30 mann i sving, fire båtar og tre ferjer. På Askøy var det 11 mann i arbeid, to båtar samt Hamnevesenet sin båt Sydnes. I Austrheim 17 mann og tre båtar, i Øygarden 22 mann og fem båtar og i Solund 12 mann og fem båtar. I tillegg vart det drive rekognosering i Gulen og på Radøy, opplyser IUA.

150 kubikk oljemasse
Dei hadde innan søndag fått teke opp 86 kubikk med oljemasse i Austrheim, 62,5 kubikk ved Fedje og 6,5 kubikk ved Askøy, fortel Isaksen. Dette utgjer både olje, forureina tang og vrakgods og litt vatn. Isaksen seier at dei reknar med at oppryddinga tek mindre tid denne gongen enn etter Rocknes-forliset, då Rocknes-forliset skjedde så langt inn i fjordane.
Isaksen reknar det no som lite aktuelt å trekkja inn Leif Øksnes sin båt Evjegris eller slamsugar i det vidare oppryddingsarbeidet. Slik det no ser ut er det lite flytande olje å sjå, så no vert det i all hovudsak snakk om raking og reingjering av strender og svaberg, meiner han.

Miniubåt
Ein miniubåt skal onsdag prøva å undersøkja akterskipet av Server for å avklara om det er fare for ytterlegare oljesøl. Akterskipet ligg på grunn like ved Hellisøy fyr sør på Fedje. Det er forsikringsselskapet Gard som har leigd eit firma til å føreta undersøkinga.