Håpar å vera med på rakettoppskyting

– Det har vore veldig interessant til no. Me har lært ein del om korleis rakettar fungerer, seier Christian Holvik på telefon frå Andøya Rakettskytefelt, lengst nord i Nordland.

17-åringen frå Meland er ein av 24 heldige ungdommar frå seks ulike land som får vera med på European Space Camp.

Leiren starta 24. juni og skal vara til 1. juli.

Byggja rakett

– No skal me begynna å byggja raketten som me skal skyta opp, fortel Christian.

Deltakarane vert delte opp i fem grupper som skal byggja kvar sin del av raketten. Kvar gruppe har med seg ein gruppeleiar som har greie på rakettar.

Det store målte er at raketten, som er 1,7 meter høg, skal skytast opp i verdsrommet på slutten av leiropphaldet. Viss alt går etter planen, skal raketten nå ei høgde på 9.000 meter.

Søknad

Christian Holvik er elev ved Knarvik vidaregåande skule, og den store interessa er realfag, og då spesielt fysikk.

For å få vera med på romfartsleiren måtte han senda inn ein søknad på førehand der han forklarte litt om seg sjølv og kvifor han ønskte å vera med på leiren. Han var heldig å verta plukka ut, saman med Christoffer Vikebø Nesse, også han frå Meland.

Leiren er sponsa av Hordaland fylkeskommune, slik at Christian berre må dekka reisa til og frå Andøya sjølv.

 
Studera fysikk

Christian fortel at han er interessert i romfart, og kanskje spesielt kva som finst ute i verdsrommet.

Når han er ferdig på vidaregåande, har han planar om å studera fysikk ved Universitetet i Bergen. Om det vert romfart eller noko anna han vil jobba med seinare, veit han ikkje.

European Space Camp, som er for ungdom mellom 17 og 20 år, vert arrangert på Andøya kvart år. Det er stor interesse for å vera med, så det er ei fjør i hatten å verta plukka ut til å delta.