Har lyst å verta oppmuntringskommune

? Me vart så oppglødde etter dialogmøtet me hadde onsdag, at me bestemte at me skal vurdera å kalla oss oppmuntringskommune, seier ordførar Håkon Matre til Strilen.
På møtet deltok også humørbonde Geir Styve frå Lindås, og hans bodskap er at oppmuntring er svært viktig for å motivera folk til å gjera sitt beste.

Innhaldet
? Dialogmøtet resulterte mellom anna i at me sende ei oppmuntring til dei tilsette på Knarvik sjukeheim, som har vore litt hardt ute i media i det siste, fortel Håkon Matre.
Ein skal no setja seg ned og prøva å systematisera kva som skal vera innhaldet i ein eventuell oppmuntringskommune.

Alltid positiv
? Det kan til dømes vera at sjølv om me i ei sak må gje eit avslag, skal me likevel ha med ei positiv formulering som kan oppmuntra søkjar til å jobba vidare med saka, seier Matre.
? Men kan ikkje eit slikt tiltak lett verta ein parodi?
? Jau, det har du rett i, og det er difor me vil arbeida meir med saka før me gjer noko formelt vedtak, seier Matre.
Kommunestyret gav ordførar velsigning til å arbeida vidare med saka.

Frøya kommune
Frøya kommune i Sør-Trøndelag har alt begynt å kalla seg oppmuntringskommune, og der har dei oppnemnt ein del oppmuntringsagentar, dette også etter inspirasjon frå Geir Styve.
? Men elles har me ikkje kome så langt, og eg er litt skuffa over at kommunestyret så langt ikkje har gripe fatt i saka, fortel  Jan Otto Fredagsvik til Strilen. Han er leiar for ein organisasjon som kallar seg «Frøya inn i framtida.»
Ideen er at ein alltid skal møta publikum med ei positiv innstilling, og også oppmuntra kvarandre i kvardagen.