Har samla inn 418.000 til barneheim

? Me håpar å samla inn i alle fall like mykje som i fjor. Då fekk me inn 204.000 kroner, seier Hanne Bø (18), aksjonsleiar ved avdeling Juvikstølen.
For tredje år på rad vel Knarvik vidaregåande å samla inn pengar til barneheimen i Merdekan i Aserbajdsjan.
? I staden for å samla inn til Operasjon Dagsverk (OD), samlar me inn til denne barneheimen, seier Bø.
Elevane kan velja om dei vil arbeida ein dag, eller om dei vil gå med bøsser for å samla pengar. Fredag vert dei første bøsseberarane å sjå i aksjon, og dei vil vera synlege heilt ut i neste veke. Skulen har mellom to- og trehundre bøsser til disposisjon. Elevane som vel å arbeida inn pengane vil få høve til det. Tysdag er det aksjonsdag for elevane på Juvikstølen, og onsdag er det elevane på Kvernhus som skal ut i arbeid.
? Nokon elevbedrifter vel å selja eigne produkt, andre arbeider heime eller i bedrifter, seier elevinspektør Ove Johannessen.

Involverte
Prosjektet engasjerer elevane, og innsamlingskomiteen er einige om at nærleiken til prosjektet er avgjerande for engasjementet. Kvart år får to elevar og ein lærar reisa til Merdekan like utanfor hovudstaden Baku for å besøka barneheimen.
Republikken ved Kaspihavet var tidlegare kommunistisk, og slit no med ein overgang frå plan- til marknadsøkonomi.
? Dei har ikkje noko velferdssystem som plukkar opp dei svake. Første året me besøkte barneheimen, var det berre eit stort, tomt hus, seier elevrådsleiar Arne-Christian Eide (18).
Han var sjølv med og fekk sjå dei miserable tilstandane for to år sidan.
? Personalet hadde ikkje opplæring, dei hadde ikkje nattevakt og eit teppe på golvet fungerte som sanitæranlegg, seier han.

Ser resultat
Knarvik vidaregåande har til saman samla inn 418.000 kroner til barneheimen dei to siste åra, og resultata av gåvene let ikkje venta på seg.
? Det har vore ei utruleg utvikling. No har dei mellom anna fått sanitæranlegg og personale med opplæring, seier Hanne Bø, som har eit sterkt ønskje om å få reisa ned og besøka barneheimen i år.
Kven som får reisa vert avgjord med loddtrekning mellom dei som gjer ein bra innsats, opplyser Johannessen. Lysta til å halda fram med arbeidet er uansett tilstades.
? Me har sett at det nyttar, og vil gjerne halda fram med dette arbeidet, seier Eide.