Har teke opp tolv tonn olje frå Server

? Til no har me konsentrert innsatsen om øya Åra mellom Byrknesøy og Røytijnga, fordi den har fått det mest omfattande oljesølet her i kommunen, seier teknisk sjef Magne Instefjord i Gulen kommune til Strilen.
Åra er ei øy med fine badevikar, og er eit populært utfartsområde i sommarhalvåret. Her er mange vikar sterkt ureina av olje, og personell frå Kystverket og frivillige frå kommunen er i full gang med å fjerna olje. Til no er det teke opp tolv tonn, og framleis er der meir. Instefjord fortel at for tida er 19 personar involverte i oppreinskinga der. Instefjord kjenner ikkje til at det er observert oljeskada sjøfugl, men det treng ikkje bety at der ikkje er fugl som har fått olje på seg.

Dingja
Men der er fleire stader i kommunen som har vorte tilgrisa av olje, om ikkje i slikt omfang som på Åra.
? I løpet av veka skal me oppretta eit depot i Dingja, med utstyr til dei som skal delta i oppreinsking i dette området av kommunen, fortel Instefjord.
Utstyret det er snakk om, er verneutstyr, bork til å strø på oljesølet, båtar og liknande.
? I nordre deler av kommunen har me ikkje funne samanhengande område som er tilgrisa slik som på Åra, men mindre strandparti og vikar spreidd rundt omkring, seier Instefjord.

Åtte millionar
Instefjord har kome fram til at oppreinskinga  etter Server-forliset ved Fedje kan kosta kommunen opp mot åtte millionar kroner.
? Det er så langt vanskeleg å seia kor mykje pengar det vert, men det kan verta så mykje, seier Instefjord.
I første omgang er det kommunen som pungar ut, men rekninga vert sendt vidare til staten gjennom Kystverket. Men til sjuande og sist er det forsikringsselskapa til båten som skal betala.
Instefjord reknar med at det vil pågå arbeid fram til påske og kanskje lenger før alt er fjerna.