Hard kamp om ingeniørane

– Me treng 200 nye ingeniørar berre i år, kunne Kurt Andreassen i Aker Subsea på CCB-basen på Sotra fortelja, då Næringsbarometeret for Hordaland vart presentert i Bergen tysdag.
Andreassen var invitert for å fortelja korleis dei gode tidene innan oljebasert verksemd slår ut for næringslivet lokalt.

Næringsbarometeret er laga på bakgrunn av spørjeundersøkingar blant bedriftene i Hordaland, for å finna ut kva dei trur om utviklinga utover i 2012.

Olje-optimistar
Undersøkinga viser at optimismen innan oljerelatert verksemd og skipsbygging er på topp.

76 prosent av verksemdene i denne bransjen ventar auka omsetnad i år, og 50 prosent trur dei må tilsetja fleire folk, og det er langt høgare enn i andre bransjar.

Tal frå Nav viser at særleg når det gjeld ingeniørar og fagarbeidarar er talet på ledige jobbar langt større enn talet på ledige personar.

Lønspress
Andreassen var uroa for at kampen om ingeniørane kan føra til lønspress, som i neste omgang kan svekka konkurranseevna.

– Me stel folk frå kvarandre, sa han.

Fullt i 2012
Også Bergen Group, som driv med skipsbygging, først og fremst på Laksevåg, ser optimistisk på 2012.

– Me forventar ein omsetnad på 2,5 milliardar kroner i år. Eigentleg er me ferdige med å planleggja 2012 og jobbar for fullt med 2013, sa informasjonssjef Øyvind Risnes, som er oppvaksen i Austrheim.

Han kunne fortelja at for å dekka sitt behov for arbeidskraft, spesielt ingeniørar, har Bergen Group rekruttert utanlands.
– Me har 30 ulike nasjonalitetar blant ingeniørane, og eg trur det er positivt for arbeidsmiljøet.

Fleire kvinner
– Kvifor prøver de ikkje å trekkja til dykk fleire kvinner som ingeniørar? Det kunne vera med på å løysa noko av problema, meinte Nina Broch Mathisen, direktør for Innovasjon Norge Hordaland.

Ho meinte framstillinga av ingeniøryrket har vore prega av mannlege klisjear som kan ha vore med på å skremma bort kvinner frå yrket.

– Det offentlege åleine klarar ikkje å snu den skeive kjønnsrekrutteringa. Her treng me hjelp frå næringslivet, sa fylkesordførar Tom-Christer Nilsen under presentasjonen.

God del kvinner
Kurt Andreassen kunne opplysa at Aker Subsea hadde ein god del kvinnelege ingeniørar, og at dei var svært godt nøgde med dei.

Både Hordaland fylkeskommune og Nav er i gang med tiltak som skal auka utdanninga av ingeniørar og gjera det lettare å koma inn i yrket, vart det opplyst.

Fagfolk
Elles viser undersøkinga at det er færre bedrifter i Nordhordland som klagar på mangel på ingeniørar enn i resten av Hordaland.

Men heile 85 prosent av verksemdene her i regionen klagar på at det er vanskeleg å få tak i dei fagarbeidarane dei har bruk for.