Havstover kan verta seksjonerte

? Det er ingen dramatikk i dette. Me har leigd ein advokat til å fylla ut dei rette skjema for seksjonering. Men Kræmmerholmen held inntil vidare fram som no. Det er ikkje snakk om endring av reguleringsplanen, seier Hans Krossøy på vegner av eigaren.
Eit selskap Krossøy og familien eig i Bergen, står i sin tur som eigar av alle aksjane i Kræmmerholmen.
Kan verta sal
? Førebels er det snakk om ei opprydding i gards- og bruksnummer, seier Krossøy.
Men han nektar heller ikkje for at sal og eventuelt tilbakeleige av havstovene kan verta aktuelt. På direkte spørsmål frå Strilen har Krossøy dette svaret:
? Det har me som eigarar ikkje tatt stilling til enno. Men det er klart at seksjonering opnar for sal og tilbakeleige i sesongen. Det ligg også føre andre planar om reiselivsutvikling på Fedje, og me gjer dette for å kunna stå friare i framtida.

I strid med planen?
Så langt er ikkje spørsmålet om seksjonering ei politisk sak på Fedje.
Men administrativt går kommunen mot at havstovene vert frittståande einingar som fritt kan seljast. Det går fram av eit ferskt brev frå teknisk sjef Øyvind Tolleshaug til Advokatfirmaet Vikse AS. «Eg vurderer det slik at føremålet med seksjoneringa er i strid med reguleringsplanen», skriv Tolleshaug.
? Dette er ei mistyding ettersom seksjoneringa berre er teknisk og ikkje inneber endring av reguleringsplanen. Kommunen har fått ei tilbakemelding om dette, seier Hans Krossøy.
Teknisk sjef Tolleshaug seier at han ikkje er nokon ekspert på seksjonering. Han er difor usikker på om dette vert ei politisk sak.

Raude tal
Når Hans Krossøy ønskjer å seksjonera for å stå fritt, viser han også til mange år med underskot for Kræmmerholmen.
? I 2005 vart underskotet 330.000 kroner, året før 181.000. Det er ikkje så veldig lurt å halda fram med raude tal på denne måten, seier Krossøy.
Han argumenterer for at ei dobling av talet på havstover, slik det var søkt om, kunne ha retta opp den økonomiske drifta.
? Men dette sa politikarane neit til, utan at eg enno skjønar kvifor, seier Krossøy.
? Kan det verta aktuelt å prøva med ein ny søknad om utviding?
? Nei, det ser eg som tvilsamt.