Heime etter fire år på alle hav

? Akkurat no er det berre veldig kjekt å vera heime att, smiler Marit Midtgård frå Hillesvåg i Lindås. Ho har vore på jordomsegling i ein 30 fots seglbåt saman med bergensaren Frode Nygaard Knutsen. Då turen starta, hadde ho aldri vore ute på ope hav før, men ho vender tilbake som fullbefaren sjøulk.
Seglbåten Petrell kom seglande inn Vågen fredag ettermiddag flankert av to andre seglbåtar i ekte Bergensver.
På Shetlands-Larsens brygge var det oppstilt ein velkomstkomité med familie og vener, utstyrte med norske flagg, ballongar og banner. Dei trossa eit ekstremt regnver for å ta i mot jordomseglarane. Men ikkje alle var så spente på heimkomsten som ein kunne tru etter fire år borte.
? Det er klart det er kjekt at dei kjem heim, seier mor til Marit, Ingrid Midtgård.
? Men me har juksa litt, og snikmøtte ho for nokre dagar sidan på Stord. Då me fekk melding om at dei var på veg, kasta me oss i båten og drog ned og trefte dei der.

Reiseruta
Sidan S/Y Petrell segla frå Bergen har ho mellom anna vore innom Skottland, Portugal, Brasil, Fransk Guyana, Panama, Galapagos, Tahiti, Fiji, New Zealand, Australia, Madagaskar, Sør-Afrika, Brasil igjen og Karibien før ho vende tilbake til Bergen.
Undervegs har dei hatt besøk av familie og vener, og dei har tatt lengre opphald for å jobba.

Naturopplevingar
? Det som har gjort mest inntrykk på turen, er alle dei hyggelege folka me har møtt. Dei har tatt godt imot oss, og gjeve oss mat og vatn og det me har trengt, fortel Marit.
Men også naturopplevingane har gjort inntrykk. Marit og Frode har opplevt eit rikt dyreliv både på land og til sjøs. Lemurar, nashorn, Galapagos-skilpadder og dugongar er berre nokre få eksempel på alt dei har sett.
? Snorkling og dykking etter perler i Stillehavet var flott, seier Marit, som fekk utbytte av perledykkinga.

Vil på tur igjen
Sjølv om fire år er lenge å vera vekke, har ikkje Marit mista smaken på reising.
? Eg dreg gjerne ut igjen. Kanskje ikkje heilt med det same, men det vert heilt sikkert noko. Det finst jo andre turar enn jordomseglingar òg.
No må Marit og Frode venna seg til livet i heimlandet igjen.
? No må eg skaffa meg jobb, seier Marit, som er utdanna sosionom, men som enno ikkje har fått praktisert det i jobbsamanheng.
? Og så må me koma i hus, grava fram alle tinga me har skaffa oss på turen og ta oss av båten.