Heimehjelpa stoppa brann

? Ho har verkeleg klart å halda hovudet kaldt, og gjorde alt rett. Dette kunne elles ha gått veldig gale, seier Sætre.
Han er son til nittiåringen som kom velberga frå ein brann heime i Budalen tysdag føremiddag. Nittiåringen fyrte i vedomnen i stova, og merka etter kvart at det vart mykje røyk i huset. Han oppdaga då at det var byrja å brenna rundt omnen.
? Det har truleg kome gnistar frå omnen, seier Ottar Sætre.
Faren fall i golvet og vart liggjande rett ved omnen. Han klarte ikkje å reisa seg. Samstundes byrja flammane å spreia seg. Men til alt hell kom heimehjelpa for å henta han til dagsenteret.

Sotskader
? Der er han kvar dag, men det varierer kva tid han vert henta, fortel Ottar.
Det var såleis eit lukketreff at heimehjelpa kom rett etter at brannen var starta. Ho oppdaga røyken med det same ho kom opp til huset, og ringte for å varsla Nordliheimen. Så gjekk ho inn i huset for å finna mannen, og byrja å sløkkja. Kort tid etter kom tre andre frå Nordliheimen til, og brannvernet var også raskt på staden. Ottar Sætre vart raskt varsla, men flammane var alt sløkt då han kom dit.
? Kvinnene frå Nordliheimen gjorde ein kjempejobb. Det kan trygt kallast ein heltedåd, seier Ottar.
Heimehjelpa som kom først til staden, fekk sotskader og eit sår i ansiktet. Ho vart sendt til sjukehus, og vart liggjande over natta. Men etter planen skulle ho utskrivast i løpet av gårsdagen.

Røykskader
Nittiåringen har og kome frå det utan alvorlege skader.
? Det går bra med han, seier Ottar Sætre.
Då Strilen gjekk i trykken i går, låg det an til at nittiåringen vart liggjande i alle fall ei natt til på sjukehus.
Flammane gjorde berre direkte skade i området rundt vedomnen. Men røykskader gjer at tapet og tak i stova etter alt å døma må skiftast ut, og møblar og anna inventar må rensast.