Heldig siger til Kvernbit

Dette var ein heldig siger for Kvernbit, då Austrheim hadde dei farlegaste sjansane i kampen. Begge lag hadde elles kvar sitt skot i tverrliggjaren, for Kvernbit sin del skjedde også det på overtid. Kampen var ikkje blant dei mest velspelte. Mykje høge ballar og tøffe duellar prega dei 90 minuttane, og det vart og delt ut heile fem gule kort i kampen. Eit par av desse etter noko som nærmast må kallast reine overfall. Men det var lite småkrangling mellom spelarane, som i staden nytta alle ledige stunder til å få i seg nok væske i det varme veret. Pauseresultatet var 0 - 1 til Kvernbit etter eit sjølvmål tidleg i kampen. Kvernbit auka så til 0 - 2 litt ut i andre omgang, før Austrheim dominerte spelet totalt siste halvtimen og reduserte og utlikna. Etter kamputviklinga å døma var det difor overraskande då Kjetil Breivik heada inn sigersmålet til Kvernbit to minutt på overtid. Kvernbit låg laurdag på andre plass med 19 poeng på 10 kampar, tre poeng bak serieleiar Smørås som berre har spelt åtte kampar. Austrheim ligg på tredje siste plass med ni poeng på ni kampar, og har ikkje hatt marginane med seg så langt i vårsesongen. Meir om kampen kjem i papirutgåva tysdag.