Hellandsjø ny president i Redningsselskapet

Hellandsjø var av valkomiteen einstemmig nominert til vervet som ny president. Men under den ekstraordinære landsmøtet laurdag var ikkje alle like samde, og ifølgje Bergens Tidende var det først etter fleire rundar det vart fleirtal for Hellandsjø. Gulen-mannen skal i utgangspunktet vera president i selskapet fram til det ordinære landsmøtet i mai.
I siste avstemning fekk Hellandsjø tillit frå 11 av dei 13 i Landsrådet.

Det ekstraordinære landsmøtet kom i stand etter at tidlegare president Magnus Stangeland og heile hans styre stilte sine plassar til disposisjon. Fleire av medlemmene av Landsrådet ville ha ein av medlemmene i det gamle styret, Gunnar Knutsen,  med vidare som ny president. Men etter at korkje Knutsen eller Hellandsjø først fekk det nødvendige to tredelars fleirtal, snudde fleire av Knutsen sine støttespelarar og valkomiteen sin kandidat vart valt.

I samband med nominasjonen til presidentvervet sa Hellandsjø til Strilen at han såg på vervet som ei viktig oppgåve.
? Det har vore veldig mykje negativ fokus på Redningsselskapet den siste tida. Redningsskøytene og sjøredningskorpsa er i liten grad påverka av dette, men alt det positive dei gjer kjem lite fram i media. Alt bråket kan få konsekvensar for dugnadsarbeid og gjevarglede, sa Hellandsjø då.

For ein del av dei andre plassane i det nye styret  valte det ekstraordinære landsmøtet andre personar enn kva valkomiteen hadde gått inn for. Avstemninga viste at Lars Hellandsjø får desse med seg i det vidare arbeidet i Redningsselskapet:
Visepresident: Thomas Colin Acher, Østfold, Vestfold og Telemark
Medlem: Anne Breiby, Møre og Romsdal
Medlem: May Britt Manin, Troms
Medlem: Arnfinn Ellingsen, Nordland
Medlem: Einar Eidshaug, Trøndelag
Vara: Nicolai Jarlsby, Agder, Knut Støbakk, Møre og Romsdal og  Anne H. Gundersen, Nordland.