Helse og frelse i hallen

- No kan eg sjå alt mulig, var det ei svaksynt dame på 92 som fortalde i går, etter at ho var bedt for, seier Randi Øksnes.
Saman med bønnegruppa si har ho arrangert helbredelsesmøtet med Svein Magne Pedersen, der alle som vil kan koma og verta bedt for og kanskje verta helbreda.

Fleire vart kristne
Øksnes fortel om den 92 år gamle dama som nesten ikkje kunne sjå då ho kom, men som etter bøna kunne lesa frå brosjyrar. Ho fortel om ei jente på tre år som vart bedt for på fanget til mora, og om minst 37 menneske som stod fram og ville verta kristne.
? Han forkynner helse og frelse. Det er det som er det viktigaste, at så mange vil verta kristne, seier ho og strålar.

Stort oppmøte
Kølappane var mange og ventetida lang for å verta bedt for. Folk slappa av i kafeen, gjekk ein tur, eller følgde spent på bønene for dei framføre dei i køen medan dei venta.
? Mange vågar ikkje gå på slike møter i bedehusa, men dørstokken er lågare når det vert arrangert i ein idrettshall. Då vågar dei komma, seier Øksnes.
Laurdag skulle dørene vera opne fram til klokka 18, men grunna stor pågang, bad Pedersen for folk i tolv timar. Omlag 220 menneske vart bedt for. Søndag var køane også lange. Ein etter ein sette dei seg i stolen framføre Pedersen så han kunne legga hendene på dei.
? Det er fantastisk med eit slikt frammøte. Det er mykje å gjera for oss som arrangerer, men resultatet er løn i seg sjølv, seier Øksnes.

Friske att
Ho har sett mange som vert helbreda, og er sikker på at mange vil ha mykje tilbake for turen til hallen.
? Det er ikkje alle som merkar helbredinga med ein gong. Nokon gongar kan dei be lenge, utan å merka noko, men brått verta friske. Andre gongar vert folk gradvis friskare med tida, seier Øksnes.
? Dei som vert helbreda, må ikkje la vera å sjekka seg hjå lege, legg ho til.
Bønnegruppa arrangerer nytt møte i byrjinga av juni, og igjen midt i september i Nordhordlandshallen. Det kosta ikkje noko å komma inn, men Øksnes håpa kollekten ville dekkja utgiftene til arrangøren.