Her kan 300.000 tonn olje grunnstøytast

? Det er snakk om å drepa ein fjord for at andre skal få leva, seier Kurt Oddekalv i Norges Miljøvernforbund.
Kystverket har peika ut 62 såkalla strandsettingsplassar i Noreg, blant dei Fonnesflaket. Dersom ein oljetankar kjem ut av kontroll, og det ikkje let seg gjera å få han til kai eller halda han i ope farvatn, kan tankaren grunnstøytast på Fonnesflaket ? anten ved å setja han på ei grunne eller styra han rett inn på land.

Peikar seg ut
? Diverre peikar Fonnesflaket seg ut av seg sjølv. Det er naturleg å ha ein strandsettingsplass i nærleiken av Mongstad, med den store tankbåt-trafikken der. Men dersom det skjer noko galt, ryk heile kysten der, seier Oddekalv.
Om det er fare for at ein oljetankar havarerer, og det ikkje er mogeleg å få kontroll til sjøs, kan tankaren takast inn til land. Då vil ein først prøva å få tankaren inn til ei nødhamn. Kaiane på Mongstad er ei av 69 slike nødhamner i Noreg.
Men om det ikkje let seg gjera å leggja kontrollert til kai, er strandsetting siste alternativ. Då vil ein styra tankaren på grunn ein stad der ver- og bunnforhold er mest mogeleg skånsame ? og der det er mogleg å avgrensa kor stort område eit oljeutslepp spreier seg over.

Enorme konsekvensar
? Dersom ein klarar å hindra olja i å spreia seg langt, vil uansett konsekvensane vera enorme for området ved Fonnesflaket. Det vil vera forureina i 10 til 15 år, alt etter kor flink ein er til å avgrensa utsleppet og ta opp olja i byrjinga. Eit oljeutslepp vil gå hardt ut over sjøfugl, men det farlegaste er det ein ikkje ser. Olja vert liggjande i fotosyntese-skiktet ned til tretti meters djup, og drep alt, seier Oddekalv

Må få utstyr
Sjølv om det inneber å ofra eit område for å ta vare på andre område, meiner Miljøvernforbundet at det er klokt å peika ut strandsettingsplassar. Men Oddekalv meiner og at det må plasserast oljevernutstyr tett ved desse plassane.
? Fjordsystema rundt Fonnesflaket må få lensebasar, slik at ein kan trekkja ut lenser og raskt stengja gjennomstrøyminga av olje der. Dette har me ønskt oss i mange år, seier Kurt Oddekalv.