Her vil Høgre ha veg over Radøy

Ser ein på kartet, viser det ein klar vestleg retning på riksvegen frå Soltveit, som i dag er stoppestad for den utbygde riksvegen over Fosnstraumen frå Austr-heim. Retninga peikar over Myking, via Sætre, forbi Dalland i tunnel og direkte mot Byrkjeland. Der kryssar den førslegne traseen eksisterande fylkesveg, går over Mangersteppene og inn til Manger. Traseen går så etter den eksisterande og no utbetra fylkesvegen til Kolstad, med tunnel derifrå til nordenden på Ulvatnet og etter eksisterande fylkesvegtrasé til Lunde. Frå Kolstad er det og sett ned på kartet veg mot Boga, tunnel under Bognøy og til Meland, pluss vegsamanknyting frå Landsvik til Odland. ? Radøy Høgre er nøgd med det vedtaket som vart gjort i kommunestyret, oppsummerte gruppeleiar John Bauge torsdag kveld.

Der vart det ingen kampvotering, for kommunestyret klussar inntil vidare ikkje med den vedtekne kommuneplanen. Den seier nemleg at ny riksveg over Radøy skal gå frå Soltveit over Sletta til Lunde med arm til Manger. Men torsdagens vedtak opnar for å drøfta eit heilt nytt og meir vestleg alternativ, som Radøy Høgre har fremja og oppnådd støtte for i fleire andre parti. Vedtaket seier nemleg at «Radøy kommune vil i samarbeid med Statens vegvesen få vurdert også eit alternativ for ny Rv 565 på vestsida av Radøy ? gjennom Manger sentrum ? mot Namtvedt og Lunde, også for betre tilpassing til eit eventuelt framtidig ytre tverrsamband i Nordhordland». ? Vedtaket må innebera at det vert snakk om ein eigen kommunedelplan for riksveg, og det er godt nok for oss i Høgre, sa Bauge til Strilen.

I forkant at rulleringa i kom-munestyret, hadde Radøy Høgre levert eit brev som signaliserer klar motstand mot å rusta opp riksvegen på austsida av øya. Argumentasjonen er at eksistetrande trasé tener nabokommunane i langt større grad enn Radøy. Manger senterforening og delar av Radøy næringsråd støttar alternativet, som kan gje den tettast befolka delen av kommunen og mange bedrifter eit betre samband mot resten av Nordhordland og Bergen. Utfallet av saka i kommunestyret kan fort tolkast som eit kompromiss, men ordførar Olav Steinar Namtvedt ville ikkje underskriva denne formuleringa då Strilen bad om ein kommentar etter møtet. Namtvedt viste til at det var heilt uaktuelt å ta eit slikt vedtak inn i kommuneplanen på kort varsel utan utgreiingar. Han la heller ikkje skjul på frykt for at nye alternativ tek tid å få utgreidd og kan resultera i at andre regionar smett forbi i kampen om statlege løyvingar. ? Burde innspelet frå Høgre kome for fem-seks år sidan? ? Heilt klart, svarte Olav Steinar Namtvedt. I kommunestyret vart kommuneplanen rullert utan debatt. Blant endringane er industriområde sør på Toska teke ut or planen, og området vert ståande som uplanlagt.