Herpa idrettsbana på Brekke

Ifølgje politibetjent Paul Henriksen ved lensmannskontoret i Gulen var det natt til førre søndag i halvtretida at ein eller fleire gjerningspersonar har drive villmannskjøring på Brekke. I tillegg til å laga mange og djupe spor på grasbana, har vedkomande også tatt fleire rundar på plenane på Brekke skule og på grusplassen tilhøyrande skulen. I tillegg er eit av skulen sine gjerde kjørt ned.

Alvorleg
På grunn av omstendet reknar politiet med at gjerningspersonen eller -personane har ein viss lokalkjennskap, men også at dei kan koma annanstad frå. Men same kor dei kjem ifrå, ser politiet svært alvorleg på hendinga då dette omfattar skadeverk på område som vert mykje brukt av born og unge.
? Grusbana og skuleplenen er ein ting, det tek kanskje vaktmeisteren seg av, men å ordna idrettsbana vil krevja mykje arbeid, seier Henriksen.
Slik han ser det er kostnadane ved å ordna bana vanskeleg å rekna ut, men politimannen trur det kjem til å gå med mange timar med dugnad for å få sett bana i stand att. I tillegg må bana stengjast til graset har vakse til.

Treng opplysningar
Politiet har snakka med mange personar i området etter hendinga, og har fått mange nyttige opplysningar. Men dei treng fleire tips og etterlyser no kontakt med personar som kan ha høyrt noko i det aktuelle tidsrommet, eller som i ettertid har sett noko som kan knytast til hendinga. Dei lurer også på om nokon natt til søndag 19. november kan ha observert ein bil med nye bulkar/skader og restar av torv og/eller jord. Det siste spørsmålet politiet vil ha svar på, er om nokon kjenner andre som kan ha opplysningar i saka.
? Alle tips er viktige, for det er ofte dei heilt små detaljane som gjer at ei sak vert oppklart, seier politibetjent Paul Henriksen.