Hjelmås kan få utviklingssenter

Regjeringa har bestemt at det skal opprettast eit kompetansesenter for distriktsutvikling, men har så langt ikkje avgjort kor dette senteret skal vera. No har Geir Styve kasta seg inn i kampen for å få deler av senteret til Hjelmås.
? Det vert spennande kva regjeringa bestemmer i denne saka, men uansett skal me få til noko på Hjelmås, seier Styve til Strilen.

Lycky Næroset
Styve har inngått samarbeid med fristaten Lycky Næroset, i Ringesaker kommune i Hedmark. Dei har søkt om få det planlagde kompetansesenteret plassert dit, og då kan Hjelmås verta deira regionsenter for Vestlandet.
? Lycky Næroset har vorte kjent både her i landet og vidare med for det tiltaksarbeidet dei har sett i gang, seier Styve.
Dette var ei bygd med fråflytting, men der no initiativrike personar har snudd utviklinga. Det er mellom anna dette arbeidet ein skal byggja vidare på viss kompetansesenteret vert lagt dit.

Arbeidsplassar
Det er antyda at det nye kompetansesenteret skal ha 10 - 14 arbeidsplassar.
? Søkjarane i Lycky Næroset har sagt at dei ikkje ønskjer å samla all aktivitene der, men har regionsenter rundt om, og då vil me vera deira avdeling på Vestlandet, seier Styve.
Det inneber at eit senter på Hjelmås kan få fire-fem arbeidsplassar.
? Viss senteret kjem hit, må me enten byggja eller leiga, seier Styve.
Geir Styve er kjend som humørbonden, og han har bygt opp garden sin på Hjelmås til eit opplevingssenter både for store og små. Han er også mykje brukt som føredragshaldar om bygdeutvikling og verdien av eit positivt arbeidsmiljø på arbeidsplassen.

Stort møte
12. januar vil Geir Styve kalla inn til eit stort møte for folk frå heile Vestlandet som har sett i gang tiltak som har gjeve utvikling på bygdene.
? Der vil me samla kreftene og visa kva me kan tilby viss regjeringa bestemmer seg for vår søknad, seier Styve.
Sjølv om regjeringa ikkje skulle bestemma seg for Lycky Næroset/Hjelmås, vil det verta sett i gang noko knytt til næringsutvikling i bygdene på Hjelmås, seier Styve, men å verta del av regjeringa sitt kompetansesenter vil sjølvsagt vera ein styrke for tiltaket.
Regionrådet har alt sendt eit brev til Kommunal- og regionaldepartementet, der dei stør søknaden frå frå Lycky Næroset og Hjelmås Humørgard.