Hørte du drønnet?

Det var klokka 23.40 det høyrdest ut som ein dynamittsalve gjekk av ein eller annan stad i midtre Lindås.

På Skauge var drønnet så sterkt at vindaugsrutene klirra og huset rista, kan me lesa på Facebook.

Same opplevinga hadde Kari Bakke som var heime i feriehuset på Vågseidet då det small.

Déjà vu

– Det small skikkeleg og heile huset rista.

Det var tydeleg at eksplosjonen gjekk i grunnen, seier Bakke.

Ho fortel at smellet gjekk kaldt nedover ryggen på henne fordi ho framleis har støkk i seg etter eit liknande drønn ein laurdags føremiddag i 1954.

Då miste to gutar i 15-16-årsalderen livet då eit grøftedynamittlager gjekk i lufta.

Ei nifs ulukke

– Det var heilt forferdeleg og gjorde eit vanvittig inntrykk. Det er mange på min alder som hugsar det, seier ho.

Det var då dei to bygutane dreiv og leika i skogen i Fjellangermarka, at ulukka skjedde.

Bakke fortel at ein veit ikkje sikkert kva som skjedde.

Men gutane hadde luftgevær med seg og ein trur dei må ha sendt ei luftgeværkule inn i torvhuset der jordstyret hadde plassert grøftedynamitt.

– Jordstyret trudde nok det var trygt å lagra grøftedynamitten langt der ute i utmarka, seier ho.

Vil vita kva det var

Bakke reknar sjølvsagt med at det ikkje var noko slikt som skjedde søndag kveld.

Då ville det nok stått i avisene.

Men noko må det ha vore.

Difor håpar ho nokon kan forklara henne og lesarane kva det var som small.

Strilen har snakka med politiet, men dei har ikkje fått inn meldingar om noko drønn søndag kveld, fortel politioverbetjent Kjell-Idar Vangberg.