Hundre bedrifter manglar pensjonsordning

Tala  kjem fram i ei undersøking Norsk Respons har utført for forsikringsselskapet Vital. Av dei hundre lokale bedriftene er det femten prosent som seier dei heller ikkje kjem til å etablera nokon pensjonsordning innan årsskiftet, slik lova krev, heiter det i ei melding frå forsikringsselskapet.

Ein av fire
Talmaterialet gjeld kommunane Modalen, Meland, Radøy, Lindås, Austrheim, Fedje, Masfjorden og Gulen. Pensjonsspørsmålet var ein viktig del av det nasjonale lønsoppgjeret. Trass i dette viser altså desse tala frå Vital at mange bedrifter i regionen ikkje kjem til å ha forsikringsordninga på plass frå nyttår.
Ifølgje meldinga frå Vital hadde ein av fire bedrifter i Nordhordland og Gulen, altså 25 prosent, enno ikkje kjøpt obligatorisk tenestepensjon (OTP) for eit par veker sidan. For heile landet var det 19 prosent som ikkje hadde skaffa dei tilsette slik pensjon. Det er særleg innan varehandel, hotell og restaurant og bygg og anlegg som har hatt låg andel av pensjon, heiter det i meldinga.

Risikerer bøter
Det er i Nord-Noreg at det er flest bedrifter som ikkje har innført pensjonsordningar. På landsbasis skal det vera rundt 2000 bedrifter som ikkje vil ha etablert ei pensjonsordning innan årsskiftet, slik lova krev.
? Bedrifter med ei slik haldning risikerer så vel tvangsbøter frå Kredittilsynet som rettskrav frå tilsette. Utan pensjonsordning vil ikkje tilsette vera forsikra, heiter det i meldinga frå Vital, som er eitt av selskapa som tilbyr slike ordningar.

? Mange tek kontakt
? Det er ein god del som tek kontakt med tanke på å få på plass pensjonsordningane før nyttår, seier Magnhild Kvingedal i Sparebanken Vest i Knarvik.
Ho fortel at banken har folk i Bergen som arbeider med dette, og bedrifter som tek kontakt vert formidla vidare dit. Kvingedal seier ho har inntrykk av at dette stort sett gjeld mindre bedrifter, og at dei større bedriftene truleg stort sett har fått pensjonsordningane på plass.