Hyttekrangel i Meland

Politikarane i Meland meiner at kommunen burde ha eit langt betre tilbod innan hytter og campingplassar. Det tok dei ikkje omsyn til då kommuneplanen vart vedtatt. Difor skapte planar om hyttebygging strid i kommunestyret onsdag. Grunneigar Gunnvor Lien ønskjer å laga til hytter og plass til campingvogner på eit område på 24 mål. I kommunestyret onsdag la fleire politikarar vekt på at Meland ikkje er det enklaste området for turistar på leiting etter eit slik tilbod. Men området er uregulert, av di politikarane i kommuneplanen ikkje har sett av eit spesifikt område til hytter og campingplass. ? Kommuneplanen er ikkje eit år gamal endå. Det er god skikk i eit kommunestyre at me legg vekt på planlegging og vurderer alle bruksområde i samband med heilheita. Eg er ikkje spesifikt mot dette prosjektet, men meiner at det vert feil å gje klarsignal utan dekning i kommuneplanen, sa Marie Morken (Samarbeidslista). Fleire fleire politikarar, mellom anna Tom Sverre Tomren (KrF), meinte at Morken hadde eit poeng. Eit ja til tiltak som ikkje ligg inne i kommuneplanen, kan vera i strid med prinsipp om likebehandling ? av di det kan vera fleire som er interessert i å byggje utleigehytter. Det vert og vanskelegare for politikarane å styra kva dei vil ha i kommunen ? og kor dei vil ha det. Samarbeidslista vart likevel ståande åleine om å seia nei til hyttene. Men fleire politikarar merka seg at planutvalet nyttar ein stor del av tida til å gje dispensasjon frå ein plan heller enn å planleggja. ? Sytti prosent av det planutvalet har av saker, er slike søknader, sa Johan A. Andersen (Høgre). Sjølv om politikarane sa ja til at det kan utarbeidast reguleringsplan for området, har dei høve til å seia nei til hytteplanane når reguleringsplanen er klar. Men Marie Morken fryktar at prosessen då har kome så langt at det vert altfor vanskeleg å seia nei.