I kø for å læra spansk

Goddag vil oftare verta bytta ut med «Buenos dias» på Fedje frå hausten, i alle høve på skulen. Med Monika Thomassen på plass med peikestokken, er elevane nemleg klare til å læra seg spansk.
Det sør-europeiske språket vert språkalternativ alt frå 7. klasse, med to timar for veka. Undervisninga vert organisert med grupper av 7. og 8. klasse pluss 8. og 9. klasse.

Prosjekt ut
? Dette vert spennande. Spansk kjem inn i staden for praktisk prosjektarbeid, som går ut or den nye læreplanen, seier rektor Helge Tangen.
Tangen fortel at så godt som alle elevar og foreldre har satsa på spansk når skulen kunne tilby det.
Det at alle klassane frå sjuande ville ha spansk, sikrar grunnlaget for å leiga inn lærar.
Når det gjeld tysk og engelsk, vert det også undervist i desse faga. Eit årstrinn ved skulen vil også ha tysk, og 10. klassingane får engelsk fordjuping.
Også Radøy
Radøy ungdomsskule er også blant skulane som kan tilby spansk frå hausten. Der er det kulturskulerektor Ann Kristin Hoen som vil ta seg av undervisninga.
? Me har faktisk måtte avgrensa talet på elevar i 8. klasse som får spansk. Det var 33-34 som hadde dette språket som førsteval, men det vert for stor gruppe. Me må ned i 26-28 elevar som får tilbodet, opplyser inspektør Harald Jordal. Han seier at utgangspunktet er å tilby elevane spansk også når dei kjem i 9. og 10. klasse.
Sjølv om spansk er «in» som nytt språk også på Radøy, er det også ei gruppe på 15 som har tysk og grupper i engelsk og norsk fordjuping.
Skulen har tidlegare kunna tilbydd undervisning i fransk, men manglar no lærekrefter i dette språket.