– Ikkje godt nok

– Me er direkte misfornøgde med framdrifta i dette prosjektet. Anleggsarbeidet skulle vera ferdig før 1. juli, men vart utsett til 1. september, og no har me fått beskjed om at den ikkje vil vera klar før 18. oktober, opplyste ordførar Nils Marton Aadland i formannskapet onsdag.

Ordføraren orienterte politikarane om saka under posten «Aktuelle saker» og fortalde at kommunen har gitt klar melding om kva dei synest om ei slik forseinking.

– Både kommunen og Frank Mohn er kraftig irritert. Arbeidet med vegen har pågått i fleire år og det har oppstått både det eine og det andre problemet undervegs. Me sit att med eit inntrykk av at det har vore alt for lite kontroll og trøkk over arbeidet der, sa Aadland.

Kommunen har hatt fleire møte med Vegvesenet i den seinare tid.

– Meldinga om at dei heller ikkje ville klara fristen i sep­tember, kom direkte over­raskande, og me har gjeve klar be­skjed om at me er lite fornøgde med situasjonen. Arbeidet har tatt for lang tid, og ein del av løysingane i anleggsperioden har vist seg å vera direkte trafikkfarlege. Det gjeld spesielt krysset ved bensinstasjonen på Mjåtveitflaten, sa Aadland, og fortalte at innbyggjarar har meldt frå om fleire farlege situasjonar i det som skal bli ei ny rundkjøring. Det kunne også nokre av politikarane i formannskapet skriva under på.

– Eg kjører den strekninga mykje og må seia at eg har reagert på at det er så sjeldan eg ser folk i arbeid der, sa Linda Kilpinen (Frp).

Politikarane fekk opplyst at kommunen skal ha nytt møte med Statens vegvesen denne veka, og at vegvesenet også skal ha møte med selskapet som utfører arbeidet på vegstrekninga.

– Me vil pressa på og håpar at det vil føra til fortgang i arbeidet, men enn så lenger er altså den nye datoen for at vegen skal vera ferdig, sett til 18. oktober, sa ordføraren.