Ikkje pengar til Rossland-bane

Bana dei brukar no driv med dispensasjon frå Hordaland Fotballkrets, og dei har fått signal om at dei ikkje vil få fornya dispensasjonen.
Dermed må dei til å leiga bane på Fossemyra eller i Knarvik, fortel Asbjørn Larsen (biletet), kommunestyrerepresentant for Ap og medlem i Nordre Holsnøy Idrettslag.
? Ein har arbeidd med å få gjort noko med baneforholda på Rossland i 20 år. Likevel ser me altså stadig vekk at andre prosjekt vert flytta framfor bana i Leirdalen, seier Larsen.
Larsen har saman med andre lokalpolitikarar frå Rossland arbeidd med å få bana på plass. Men dei kjem ingen veg.
? Me føler at me ikkje får nokon hjelp frå nokon i kommunen. Eit unntak er kulturkonsulent Halldis Dokken Urdal, som har hjelpt oss mellom anna med søknader. Me står klar med ein dugnadsgjeng, gravemaskin og 300.000 kroner i oppsparte midlar. Det einaste me treng er ein kommunal garanti for å koma i gong, fortel Larsen.

Sju millionar
Klubben reknar med at ei ny bane med kunstgrasdekke, lysanlegg, veg og parkering vil koma på rundt sju millionar kroner.
Det vil få svært negative konsekvensar for Nordre Holsnøy idrettslag om dei ikkje får gjort noko med banetilhøva. Larsen fortel at dei til dømes i år for første gong på lenge ikkje klarar å stilla eit eige A-lag til ellevarfotball. Han reagerer sterkt på at dei stadig opplever at andre anlegg i Meland vert flytta framfor bana på Rossland.
Det siste tilfellet var tilrettelegging for fleirbrukshallen på Fossemyra ? slik at dei stod klar til å ta imot gåva frå Trond Mohn.
? Meiner du at ein skulle ha takka nei til denne gåva?
? Sidan dette førte til at ingen ting vart gjort med bana på Rossland, så ja. Men samstundes har handballag frå Nordre Holsnøy stor glede av den nye fleirbrukshallen, seier Larsen.
? Har du ikkje forståing for at kommunen er under administrasjon av fylkeskommunen, og difor ikkje kan investera i eit slikt prosjekt?
? Det viser seg at ein finn pengar viss ein leitar og verkeleg vil gjera noko. Det siste dømet på dette er at dei har føreslege å bruka ein million kroner på å førebu bygging av ei kyrkje på Frekhaug, seier Larsen, som vil røysta mot det forslaget.

? Har vedtatt tilskot
? Kommunestyret har tidlegare vedteke at kommunen skal gå inn med tilskot til bana på Rossland, på same måte som det er gjeve tilskot til Kvernbit, seier ordførar Solbjørg Åmdal Sandvik.
Ho seier at kommunen ønskjer at prosjektet på Rossland vert realisert, og at dei har ein dialog med Nordre Holsnøy IL om dette. Kommunen har så langt og kjøpt grunn til bana
Kommunalsjef for kultur og oppvekst, Stein Flataker, har vore med i samtalene med Nordre Holsnøy IL. Han fortel at grunnen til at framdrifta for bana på Rossland har stoppa opp, er at ein føresetnad for å søkja tippemidlar er at prosjektet har klar ein finansieringsplan, då verken kommunen eller idrettslaget har nok pengar til å dekka sin del av prosjektet.
? Det vanlege er at kommunen dekkar ein tredjepart, tippemidlane ein tredjepart og klubben ein tredjepart gjennom dugnad, eigne midlar og sponsorar, seier han.
Han seier og at det vert jobba med dette, men at ein så langt ikkje har fått til noko løysing.
? Eg synest elles at det er veldig synd at me ikkje har klart å få dette til enno. Det er eit veldig godt prosjekt, seier Flataker.