Ikkje varige mein i Gulen

På  bakgrunn av prøvane som er tekne, og kommunelegane i Gulen og Masfjorden sine undersøking av pasientar som har hatt helseplager etter brannen hos Vest Tank i Sløvåg 24. mai, har Folkehelsa konkludert med at det ikkje skal vera fare for at folk skal få varige helseplager. Det kom fram då folk frå Folkehelsa, kommunelegane og kommuneleiinga i Gulen hadde møte i Eivindvik onsdag.
? Desse opplysningane er ein stor lette for oss, og me håpar dei også vil vera til hjelp for folk som er urolege, seier ordførar Trude Brosvik til Strilen.

Ekte sjuke
På møtet presiserte folk frå Folkehelsa at dei helseplagene som folk hadde fått, var reelle nok.
? Dei var ikkje innbilt sjuke, seier Brosvik.
Ei undersøking i nærområdet rundt Sløvåg viste at 55 prosent av dei som oppheldt seg i området, hadde hatt større eller mindre helseplager.
? Dette viser at problem etter brannen har vore omfattande, seier ordføraren.
Og problema er ikkje heilt over, sjølv om luktplagene har vore mindre dei siste veke.
? Verksemda har sagt at oppryddinga skal vera ferdig denne veka, og i samband med denne oppryddinga kan det oppstå nye luktproblem.

Koma seg bort
Enkelte folk reagerer meir på den sterke lukta enn andre, og dei som har vorte sjuke, har lettare for å verta sjuke igjen.
? Toleransegrensa går nedover, forklarar Brosvik.
Allergikarar kan vera meir plage enn andre.
Den beste medisinen er å koma seg bort frå området der det luktar.

Folkemøte
Det vil vera innkalla til eit nytt folkemøte for folk i søre Gulen, der ein skal prøva å oppsummera det som har skjedd etter brannen.
? Møtet vert truleg i veke 30, seier Brosvik.
Til det møtet håpar ein å ha resultat frå dei siste prøvane som er tekne på oppdrag av Statens foruresningstilsyn (SFT) denne veka. Til møtet vil både Folkehelsa, STF, kommunelegane, politiet og Direktoratet for samfunnstyggleik og beredskap verta inviterte, seier Brosvik.