Influensafrykt gjev redusert kyllingsal

? Eg merkar det på småsalet, hobbybøndene som skal ha ein 5-10 høner, seier Tore Villanger.

Villanger er einaste produsenten av livkyllingar i Hordaland og Sogn og Fjordane, og kvart år veks kring 50.000 kyllingar opp i driftsbygningen hans. Kyllingane kjem når dei er daggamle, og går så vidare til eggprodusentar etter 16-18 veker. Då er kyllingane vortne verpande høner.

? For dei aller fleste kyllingane har eg avtalar med eggprodusentar, og då vert avtalane gjort alt før eg får kyllingane hit.

Eggprodusentane har hønene innomhus, og vert ikkje råka av dei nye restriksjonane om at fuglar ikkje kan gå ute under open himmel. Men av dei 2-300 mindre kundane Villanger har i Hordaland og Sogn og Fjordane, er det ein del som før har hatt hønene ute.

? Alt i fjor haust var det var ein del som ringte og sa at dei ikkje skulle ha dei ti hønene dei hadde bestilt.

25 år

Av dei 20.000 livkyllingane Villanger har i hus i dag er 19.000 av den typen som går til eggprodusentar. Dei siste tusen er av typen Lohmann brun, og er berekna på sal til «hobbybønder». Villanger vonar det skal gå greitt å få avsetning også på desse.

? No må desse verta innandørshøner. Eg må kryssa fingrane og vona at det går greitt å selja dei, seier han.

Restriksjonane frå statleg hald skal hindra at sjuk villfugl smittar høner og andre husdyr. Ved å halda hønene innandørs unngår ein smittefaren som oppstår ved kontakt med ville fuglar.

? Mange av dei andre tiltaka som i dag vert framstilt som nye, er noko me har hatt i mange år. Til dømes at ein ikkje kan vera i ein kyllingbesetning innan dei tre første dagane etter at ein har vore i utlandet, seier Villanger.

Elles har kyllingprodusentane strenge rutinar for korleis ein skal kle seg når ein er på arbeid i driftsbygningen, med eigne sko og klede til bruk i kyllinghuset.

? Eg starta her i februar 1981, så eg har 25 års-jubileum nett no. I løpet av desse åra så har eg, bank i bordet, ikkje hatt sjukdom på kyllingane mine, seier Villanger.

Ikkje redd

Villanger er ikkje redd for fugleinfluensaen, og peikar på at det på årsbasis er under hundre menneske som vert råka av sjukdommen.

? Sjansen for at du skal vinna i Lotto er mykje større enn for at du skal verta sjuk.

Så lenge dei som driv med kylling og høns driv etter det reglane som styresmaktene gjev, trur han at ein unngår sjukdomstilfelle hjå norske husdyr.

? Det næraste sjukdomen har kome Noreg så langt er Tyskland. Me som driv i denne næringa må berre ta fugleinfluensaen som ei utfordring, og følgja dei reglane som gjeld, seier Tore Villanger.

? Men skrekkscenariet er sjølvsagt at det skal byrja å smitta frå folk til folk.

Satsar vidare

Godt og vel 900.000 livkyllingar har i løpet av dei siste 25 åra vore utom på Villanger før dei har enda som verpehøns. Med ein årsproduksjon på 50.000 livkyllingar er ikkje millionen langt unna, men Villanger har ingen planar om å gje seg. Når dagens kyllingar skal ut av huset i mars-april, har han ein knapp månad på seg før neste innsetting.

? Planen er å nytta den tida til å setja inn ny innreiing i eitt av dei to husa. Dette vert ei løysing der kyllingane er i bur dei første to-tre vekene, og så går fritt etter det, seier Tore Villanger.