Influensavaksinen er på veg!

Har du tenkt å vaksinera deg mot influensa i år, kan det vera lurt å ta kontakt med sitt respektive legekontor snart. For innan to veker er årets influensavaksine klar, seier kommuneoverlegen i Lindås Lars Lie.

Gratis for risikogruppene
Han fortel at dei som først og fremst bør vaksinera seg, er dei som kjem inn under ei av risikogruppene legane har definert. Det er born og vaksne med alvorlege lungesjukdomar (spesielt dei som har nedsett lungekapasitet), born og vaksne med sjukdomar som gjev nedsett immunforsvar, born og vaksne med kroniske hjarte- og karsjukdomar, folk med sukkersjuke, bebuarar på alders- og sjukeheimar og personar over 65 år. Desse får sjølve vaksinen gratis ved å ta kontakt med legekontoret sitt, men dei må betala for å setja vaksinen dersom dei ikkje har frikort.

Lurt uansett
Andre som vil vaksinera seg, må sjølv kjøpa og betala for vaksinen på apoteket, og deretter bestilla time hjå fastlegen sin for å få sett vaksinen. Også desse må betala for å få sett vaksinen dersom ein ikkje har frikort.
? Men treng folk som er friske og ikkje kjem inn under risikogruppene eigentleg vaksinera seg?
? Dei kan godt vaksinera seg likevel, for jo færre som vert sjuke, dess færre vert smitta. På den måten gjer ei folkehelsa ei teneste, seier Lie. Han fortel at vaksinen er laga av ein del av eit virus og at den gjev få biverknader. Han legg til at dei i år har bestilt langt fleire vaksiner enn i fjor, og difor reknar med at dei skal ha nok til alle.