Innbrot i Avisa Nordhordland

? Me klarer oss heldigvis slik at det ikkje går ut over avisproduksjonen, men det ganske fortvilande, seier redaktør Randi Bjørlo oppgitt. Ho fortel at tjuvane også har stole 7000 kroner frå kassen, ein scanner, brote opp fleire låste skap og herja med telefonane.

Verkar planlaust
Tjuvane har brote seg inn bakdøra og tatt for seg alle kontora i redaksjonen bortsett  frå to. På marknadsavdelinga har dei berre stole eit kamera.
? Det verkar som dei har tatt det dei har funne utan å ha nokon plan, så eg er sjeleglad dei ikkje har rota med deskmaskinene eller serverane. Dei har vel tatt det dei tenkte var lettast omsetjeleg, meiner Bjørlo.
Ho fortel at tjuvane ikkje har fått med seg nokon «statsløyndomar», men at dei journalistane det gjeld truleg må ta opp att ein del bilde og at dei har mista ein del notatar.  
Avisa Nordhordland ligg i fjerde etasje i Promenaden i Knarvik Senter.
Saka er meld til politi og forsikringsselskap.

På sporet
På grunn av etterforskinga vil ikkje politiet ut med kva spor dei har i saka anna enn at tjuvane er snappa opp av eit overvakingskamera.
? Ut i frå filmen etterforskar me saka med utgangspunkt i visse likskapstrekk med andre tidlegare saker, fortel politibetjent Glenn Våge ved Lindås og Meland lensmannskontor.