Innbrot på Alversund skule

? Dersom tjuvane var ute etter pengar, stiller eg meg undrande til at dei braut seg inn på ein skule, seier rektor Ole Henry Halleraker.
Han fortel at det var ein av lærarane som oppdaga innbrotet søndag då ho skulle inn på skulen for å jobba litt. Læraren varsla så rektor, som igjen varsla vakttenesta til kommunen og politiet for å få skulen sikra. Innbrotet vart meld til politiet klokka halv to søndag ettermiddag. Politiet veit ikkje akkurat kor tid innbrotet har skjedd, men lensmann Einar Vatne trur at innbrotet har skjedd natt til søndag.
Tjuvane har tatt seg inn på skulen ved å knusa ei stor rute i døra til hovudinngangen. Deretter har dei brote opp døra inn til personalfløyen ved å løysa dørlistene. I personalfløyen har dei gått laus på begge inngangane til rektor sitt kontor ? både gjennom døra frå gangen og døra som fører inn til forkontoret. Men ingen av dørene har dei klart å få opp.
Personalrommet der i mot, trengte dei ikkje bryta opp, for det stod ope. Her tyder spor på at tjuvane har tatt seg ein pause i arbeidet og kost seg med yoghurt, juice og sukkerbitar. Kanskje det var difor dei prøvde seg på døra inn til tannlegefløyen etterpå?
Tannlege Siva Thilliampalam ved Alversund Tannlegekontor fortel at ingenting tyder på at tjuvane har vore inne på sjølve tannlegekontoret.