Innbrotstjuvar på to skular og eitt rådhus

? Me ønskjer svært gjerne tips frå publikum, seier lensmann Einar Vatne.

Tysdag kveld vart det stole to berbare datamaskiner frå Knarvik vidaregåande skule i Lindås. Tjuvane har og fått med seg eit digitalkamera og noko pengar. Innbrotet fann truleg stad kring klokka ti.

? Det er ting som tyder på at dei har vore inne på gymnaset før dørene stengte. Så har dei brote seg inn på andre rom, seier Vatne.

I natt var det og innbrot på Rossland skule i Meland. Her har tjuvane fått med seg ni heilt nye berbare datamaskiner. Tjuvane braut seg etter alt å døma inn ein gong mellom klokka tre og klokka seks natt til onsdag.

Det har også vore ubedne gjestar på rådhuset på Frekhaug. Her har ein førebels ikkje full oversikt over kva som manglar. Men ein berbar videoprosjektør er borte. Tjuvane har brote seg inn i eit nøkkelskap, noko som skapar praktiske problem for dei tilsette på rådhuset.

? Me må sperra alle inngangar, for å sikra oss mot at tjuvar kjem att og låser seg inn, seier rådmann Helge Thorsen.

Dermed kan dei tilsette førebels ikkje koma og gå heilt som dei vil. Ifølgje rådmannen har tjuvane gått systematisk fram, og leita gjennom skap og skuffer i rom etter rom.

? Det tyder på at tjuvane må ha ein viss lokalkunnskap, seier han.

I nybygget på rådhuset er det alarmsystem. Det er det også i delen som husar kommunestyresalen og kyrkja sine kontor. I delen som vender bort mot Frekhaug senter, er det ikkje alarm. Dette har tjuvane etter alt å døma vore klar over, av di dei har halde seg i denne delen av bygget.

? Me skal ha på plass ein felles alarm for heile rådhuset, seier Helge Thorsen til Strilen.

Innbrota dei tre stadane fann stad same døgn. Men Lindås og Meland lensmannskontor kan ikkje seia sikkert at det er dei same tjuvane som har forsynt seg alle tre stadane.