Intens moro med bandy

? Bandy er fart og spenning, og intens moro med bånn gass i 2-3 minuttar om gangen, fortel Frode Furnes frå Frekhaug og Kim André Vangberg frå Alversund.
Dei to har gått i spissen for å få i gang eit bandy-miljø i Nordhordland, noko som har gått over all forventning.
? Me byrja med eit senior- og eit gutelag for NBK våren 2005. No har me i tillegg med eit
juniorlag, eit smågutelag og eit småjentelag, seier Vangberg.
? Aldersspennet er stort, frå yngstemann på 10 til eldstemann på nesten femti, seier Furnes.
Gutane har fått opp auga for innebandy gjennom spel i gymtimane, og seinare gjennom lag i studentmiljøa.
No spelar dei bandy så ofte dei kan. Furnes sjonglerar fire jobbar og bandyspeling, medan Vangberg studerer og spelar på fleire lag, med trening fire-fem gonger i veka.
Begge trenar ulike bandylag. På seniorlaget, som spelte i tredjedivisjon førre sesong, spelar dei saman.
?  No satsar me på opprykk, seier trenar Vangberg.
Sjølv om dei berre har vore med i serien eitt år tidlegare, har dei erfart at dei kan måla seg med dei andre laga.
? Me leia halve sesongen i fjor, men så sovna me etter julefeiringa og gjekk på tre strake tap. Då var det gjort. Me enda på ein femteplass av sju, seier Vangberg. Hobbyen har smitta over på mange strilar det siste året.
? På første trening for dei yngste var det 29 som stilte. På det meste har me vore 32, seier Furnes, som trenar dei yngste laga.
Til hausten håpar dei to bandy-entusiastane på at endå fleire skal få augo opp for den artige sporten. Med nye treningstider og store ambisjonar satsar dei på å få alle laga med i serien i sesongen som kjem.
? Me vil verta fleire, og me vil ha med alle. Prøv noko nytt med fart og spenning, seier dei to, og oppfordrar interesserte til å gå inn på heimesidene eller ta kontakt med dei direkte.
Treningane startar opp att ved skulestart.