Intersport til Frekhaug

Det er Jan Erik Fossen i Intersport Bergen som opplyser dette.

Han har saman med Thomas Nordal alt fire butikkar i drift i Hordaland; tre i Bergen og ein på Voss. Butikken på Frekhaug vert på 400 kvadratmeter, og vert med det den største sportsbutikken i Nordhordland.

Satsar på service

? Det viktigaste er ikkje å vera størst, men å vera så god som mogleg og gje god service overfor kundane, seier Fossen.

Dei har så smått starta arbeidet med å rekruttera tilsette til butikken på Frekhaug. Det vil vera snakk om minst fem arbeidsplassar.

Fossen seier elles at det for dei er svært viktig å halda eit høgt fagleg nivå. Det er og viktig å vera audmjuk i forhold til kundane sine ønskje og behov. Å tilsetja dei rette personane er difor svært viktig. Men samstundes er det eit opplæringsprogram i Intersport-kjeda som dei kan dra nytte av.

? Intersport er verdas største sportskjede med 4.500 butikkar. Det finst difor gode program for opplæring, seier Fossen.

Satsingsområde

Han seier elles at dei har vorte godt mottekne på Frekhaug av både huseigarar og andre dei har møtt. Han har og tru på utviklinga i senterområdet.

Sjølv om denne butikken vert ein konkurrent til sportsbutikkane i Knarvik, er målet først og fremst å verta eit godt supplement til desse, seier Fossen.

Butikken skal ha eit breitt utval av sportsutstyr og klede, men skal i første omgang satsa spesielt på løpssko og teknisk bekledning.