Isdalstø rasar mot «strandpromenade»

? Eg har 40 meter strandlinje og ein sti ned til naustet på den sørlege enden. Men mot nord ser alle at det er stupbratt berg rett i sjøen. Eg kan ikkje fatta at kommunen tenkjer  på å skyta ein gangveg inn i fjellet. Og skal dei gå lenger opp, kjem dei inn i hagen min, seier Magnar Skjelvik, som har budd ved sjøen i Isdalstø i 50 år.
Skjelvik er berre ein av mange som protesterer høgtlydt mot to nye framlegg  i kommunedelplanen for Knarvik/Alversund: Ein innteikna strandpromenade og det kommunen sine planleggjarar kallar ei «Byggegrense mot sjø».

«Skal gå an»
I framlegget viser kommunen til at berre nokre få stader mellom Gjervik og Alversund er strandsona relativ flat.
Men sjansane for å få etablera ein strandsti langs med sjøen i heile planområdet er vurdert. «Dette skal vera mogeleg med ein del tilrettelegging. Traseen er lagt inn i plankartet», skriv kommunen.
I merknadene har ein grunneigar i Alverstraumen uttrykt «stor sans for forslaget om ei strandline med sti frå Alversundbrua til Gjervik». Dette er noko som raskt burde koma til glede for alle som bur i området, og for dei som treng slike rekreasjonstilbod, heiter det i brevet.
Men Magnar Skjelvik og minst 13 andre i Isdalstø er langt frå glade for framlegget. Dei har protestert via advokat Halfdan Mellbye.
Grunneigarane reagerer særleg negativt på at kommunen føreslår spesielle byggjerestriksjonar på deira eigedommar. Advokat Mellby viser her til formuleringa «byggegrense mot sjø», utan at han vil gje til kjenne ei oppfatning av kva det betyr rettsleg sett. Men han antydar at det kan oppfattast som eit byggjeforbod mot sjøen.
Og Mellbye gjer det klinkande klart at hans 14 klientar ikkje ønskjer ei slik byggjegrense.

Mot strandsti
Den andre innvendinga kjem mot «strandpromenaden» som kommunen ivrar for. Og Magnar Skjelvik var ikkje i stuss på at han måtte protestera då han vart kjend med kommunen sine ønskje.
? På nedsida av huset vårt har me plen og gode frukttre. Eg kan ikkje heilt tru at kommunen vil oreigna for å få til ein offentleg gangsti her. Det vil me ikkje lika! seier Skjelvik etter å ha vist Strilen rundt på den fint opparbeidde tomta på vel to mål.
Advokat Mellbye skriv at «Grunneigaren treng ikkje finna seg i at ålmenta skal få gå mellom frukttrea hans. Eigedommen kan heller ikkje ved ein strandpromenaden sikrast for ålmenta. Det vil vera i strid med privatlivets fred», skriv advokat Mellbye.