Jaktar pengar til ei rundkøyring

? Etter eit nyleg møte ser det ut for at vegvesenet er med på å dela ei vegutbygging i Knarvik opp i to steg. Det kan opna for at det i første runde kjem ei rundkøyring ved Fossbygget, opplyser plansjef Lars Johan Haukås.
Samstundes viser han til at ei snarleg rundkøyring er avhengig av det lokale næringslivet.
? Fleire planar kan verta stoppa utan at næringslivet i Knarvik er villig til å yta noko. Midlane må koma anten som direkte tilskot eller lån som ei forskottering, seier Haukås.
Han legg til at han på møtet, som var 27. mars, fekk inntrykk av at det no er ein slik vilje.

? Vil fordela trafikk
Eit anlegg som mangel på rundkøyring stoppar, er Knarvik Senter sine planar om eit større parkeringshus for opp mot 1000 bilar. Bygget er planlagt mot Nordhordland vidaregåande, der det i dag er p-plass.
Her er det aktuelt å gå ned i terrenget og få inn nye butikklokale på bakkeplan.
? Ei rundkøyring ved senteret er framleis aktuelt. Men ei første rundkøyring nedom «yrkesskulen» vil fordela den store trafikken i Knarvik på ein langt betre måte enn i dag. Frå administrasjonen i Lindås si side er me også med på å ta ei slik rundkøyring først, seier Haukås.

? Lammar Knarvik
? Utan ei løysing av trafikkproblema i Knarvik, vert ei vidare næringssatsing lamma, seier Olav Kåre Vatnøy og Oddvar Rune Villanger. Dei snakkar både for Knarvik Senter og Knarvik Senterutvikling A/S. Sistnemnde selskap vart stifta i fjor av dei fleste grunneigarane i Knarvik senter.
Dei to meiner ei første rundkøyring vil avhjelpa den trafikkkorken som periodevis er i Knarvik. Inntil rundkøyringa kjem, er dei innforstått med at kommunen og vegvesenet vil stoppa fleire planar om nye bygg og utvidingar i Knarvik.
? Av og til kan folk brukar lengre tid på å køyra nokre hundre meter enn å køyra til og frå Åsane Senter, seier Vatnøy.
Han håpar at ei rundkøyring i første omgang ikkje vil forseinka den ved senteret/Skysstasjonen, som også ligg inne i den gjeldande reguleringsplanen. Den planen er no fire år gammal, utan at noko har skjedd så langt.   
I det nylege møtet med vegvesenet og kommunen møtte både utsendingar frå Knarvik Senter og Knarvik Næringsforening (butikkane på sørsida av riksvegen).