Jobbar vidare med hall i Sløvåg

Det er vel eitt år sidan lag og organisasjonar i Gulen og Masfjorden saman med næringslivet i Sløvåg begynte å planleggja ein fleirbrukshall i Sløvåg. Arbeidsgruppa har no fått arkitekt til å laga ei skisse av fleirbrukshallen, som dei tenkjer seg plassert i Steinsvågen, ved den nye traseen for vegen frå Sløvåg til Fivelsdal.

I hallen ønskjer dei seg 25 meters symjebasseng med stupetårn, terapibasseng, barnebasseng og vassklier.

Velvere

Idrettshallen skal ha internasjonale mål for handball med tribune.

Vidare ønskjer dei seg ein velvereavdeling, som kan nyttast til både offentleg og privat rehabilitering.

Modellen for anlegget har dei funne på Kuventræ i Os, og folk frå Os kommune deltok på eit fellesmøte i Sløvåg 22. november.

Ut frå den førebelse skissa har ein stipulert anlegget til ein kostnad på mellom 70 og 80 millionar kroner.

Fjernvarme

Arbeidsgruppa ser for seg at energi til oppvarming kan ein få frå det planlagde forbrenningsanlegget til Wergeland-Halsvik AS.

Det er også inngått avtale med konsulentfirmaet Grønstad og Tveito om utarbeiding av reguleringsplan.

Spelemidlar

Arbeidsgruppa håpar no at både Gulen og Masfjorden tek anlegget inn i sine planar, slik at ein kan få spelemidlar til anlegget. Anleggsstart ser ein for seg i tidsrommet 2007 til 2009, når den nye vegen er på plass.