Jublar for å gå til Knarvik

? Jippi!
Det er den korte oppsummeringa når Strilen tysdag møter kring 10 av 16 sjuandeklassingar ved Leiknes skule. Etter kommunestyret sitt vedtak har dei tatt til å innstilla seg på å starta ved Ostereidet ungdomsskule frå hausten av.
Også fire foreldre som har tid til å stilla på kort varsel, er nøgde med at Fylkesmannen stemplar flyttevedtaket som ulovleg.
Elevane skal etter lova gå på «den skulen som ligg nærmast». Vedtaket fleirtalet i kommunestyret gjorde i oktober i fjor, er kjent ugyldig i eit ferskt brev som foreldra studerer nøye når Strilen deler ut kopiar.

Mange argument
? Me er ikkje i tvil om at alle i klassen er glade dersom me skal til Knarvik og ikkje til Ostereidet, er omkvedet blant ivrige elevar. Blant dei er Fredrik Hansen, men han skal uansett gå i Knarvik av di familien flyttar dit.
Martin Bakkesæter og Kenneth Tredal har ingen flytteplanar, og dei er ikkje i tvil:
? Me vert veldig glade for å koma til Knarvik. Det same seier jentene som har møtt opp, blant anna Irene Fyllingen og Karoline Sandvik.
? Eg har ei storesøster som går i Knarvik og vil at ho skal hjelpa meg med leksene! seier Irene. Fotballspeling i Knarvik er også blant argumenta frå jentene.
? Og så er det veldig lang reisetid for mange til Ostereidet når bussen skal gå gamlevegen. Opp til ein time. Til Knarvik tek det berre ti minuttar, toppen femten, påpeikar fleire elevar.

Gledeleg
? Dette var ei gledeleg melding. Det er faktisk ein god del av 7. klassingane som har kvidd seg til at dei skal til Ostereidet, seier Ragnhild Tredal.  Ho er positiv til meldinga om ulovleg vedtak i kommunestyret. Samstundes påpeikar ho at foreldra er litt delte.
Sjølv var ho blant dei som kryssa av for Ostereidet ved ei fersk kartlegging, ut frå blant anna argumentasjon om at det vert betre plass ved skulen der.
? Hjå oss er det ikkje tvil om at me vil ha ungane våre til Knarvik, seier foreldra Marianne Mo, Yvonne Juvik og Geir Magne Sætre. Dei viser til at Leiknes-elevane i mange år har gått til Knarvik ungdomsskule. Difor har dei også knytt kontaktar den vegen.

Jublar ikkje
? Brevet frå Fylkesmannen er gledeleg, men eg vel å ikkje jubla for tidleg, seier Ragnhild Tredal.
Ho og dei andre foreldra seier at dei føler seg litt beklemte, og som kasteballar.
Tredal viser til at det er knapt tre år sidan tidlegare skulesjef antyda at Leiknes skule kunne verta nedlagt.
? Kort tid etter er det skåling for at kommunen vil byggja ny skule. Så vil kommunestyret flytta dei eldste elevane til Ostereidet på ungdomsskule. Nyleg var me på møte i Knarvik omkring rektorbråket. Kommunen har lenge halde oss i ein usikker situasjon, seier Tredal.