Jublar for ny og større skule

? Omtrent her kjem nybygget, forklarer rektor Inge A. Alver. Litt av plenane ved avdelinga på Juvikstølen vil ryka med.
Men det heftar ikkje når fylkesrådmannen kjem med positiv tilråding for å dobla utbygginga.
Dei elevane rektor har med seg, vil truleg berre få oppleva byggjestart. Skal dei få undervisning i nybygget, må dei stryka. Og det er det neppe nokon som håpar på.
Men dagens elevar nektar ikkje for at det trengst eit nybygg. Lokala skulen i dag kan tilby, er etter kvart nokså nedslitne.
? Og tronge! føyer rektor til. Han hadde eit håp om den positive tilrådinga som no ligg på bordet. Men det er jo typisk at me får vita dette via pressa! kommenterte Alver til Strilen i går.
Rektor håpar på byggjestart i 2007/2008 og innflytting vel eit år seinare.

Auka elevtal
Nybygget er planlagt frå august 2005 av folk frå skulen og fylkeskommunen. Så langt er det berre laga romprogram, ikkje skisser som viser korleis skulen vil ta seg ut i terrenget.
? Det er endringar i Kunnskapsløftet og auka elevtal som gjer at rombehovet er nær dobla, seier rektor Alver. Nye tilbod ved skulen gjer at elevtalet høgst truleg passerer 1000 innan eit par år.
? Tilbygget skal først og fremst erstatta lokala som me leiger i senteret, påpeikar Alver.
Han håpar at det i neste omgang kjem eit byggjesteg to som vil erstatta tidlegare «yrkesskulen». Då trengst det rundt 5000 rutemeter i tillegg, for å få heile  Knarvik vidaregåande under eitt tak.

Ny runde politisk
«Tilbygget ved Knarvik vidaregåande skule vert planlagt med eit areal på 4.200 kvadratmeter og ei kostnadsramme på 92 millionar kroner».
Det er den korte tilrådinga signert fylkesrådmannen. Saka skal opp i opplærings- og helseutvalet 7. februar og i fylkesutvalet 22. eller 23. februar. Går alt greitt, passerer saka fylkestinget i midten av mars.
Det er doblinga i kostnad som gjer at fylkesrådmannen må ha saka opp til ny politisk behandling. Alternativet med 2200 nye rutemeter gjev ikkje plass for det elevtalet fylkestinget sjølv har opna for. Fylkesmannen har og skissert eit alternativ med 3.200 rutemeter til 70 millionar kroner. Men det mest framtidsretta er å dobla dei tidlegare planane, tilrår fylkesrådmann Paul M. Nilsen.