Julehandel for 277 millionar i Nordhordland og Gulen

Av Yngve Johnsen

Dette er tilfelle dersom me handlar i tråd med landsgjennomsnittet.
At pengane får bein å gå på no i desember skal vere kjend for dei fleste.
Og det er ingen grunn til å tru at innbyggjarane i våre åtte kommunar er blant dei som lèt vera å halda betalingsterminalane varme.
Dersom me trur at folk frå Nordhordland har det same gjennomsnittlege handlemønsteret som nordmenn flest, så ryk det 277 millionar kronar ut av lommebøkene vår denne månaden. Det er faktisk 8740 kroner per innbyggjar, og då har me teke med både store og små. For ikkje å skremma deg frå vidare lesing, så skal du då få lov til å rekna ut den totale julekostnaden til husstanden din sjølv - om du har lyst.

Aukar femti prosent
I gjennomsnitt for resten av året brukar kvar av oss 5865 kroner per månad på detaljhandel.
Det betyr at me brukar nesten femti prosent meir pengar på butikkhandel i desember enn me gjer elles i året. Det er tal frå Statistisk Sentralbyrå som viser dette. Byrået har lagt til grunn at handelsveksten, som har vore på 4,6 prosent hittil i år, held fram ut året.
For vår del betyr det at i ein gjennomsnittleg månad elles i året har me eit forbruk på 186 millionar kroner i detaljhandelen.
Auken i desember er altså på 91 millionar kroner - berre her i Nordhordland.

Mykje alkohol
Det er mat og drikke som opptek mest plass i handlevognene våre no i desember. I Noreg vert det brukt svimlande 16 milliardar kroner på mat og drikke i årets siste månad. Det er 3463 kroner per person, og det betyr at 110 millionar kroner vert brukt til å sikra oss velfylte kjøleskap, kakeboksar og fryseboksar berre her i Nordhordland.
For ikkje å gløyma barskapet. Av dei 16 milliardane som vert brukte til mat og drikke i desember her i landet, så vert heile to milliardar kroner lagt igjen på Vinmonopolet. Perspektivet vert lettare å fatta når me reknar om til lokale tal: Innbyggjarane her i Nordhordland forventast nemleg å bruka utrulege 13.787.000 kroner på vin og brennevin i jula. 13,7 millionar kroner. I tillegg kjem øl og rusbrus-salet i daglegvarekjedene.

Mykje gull
Desember månad er bokstavleg tala gull verdt for gullsmed-forretningane. I desember aukar omsetninga nesten tre gonger sett i forhold til resten av året, og nordhordlendingane vil handla smykke, armband og liknande for 4,6 millionar kroner i løpet av julemånaden. Det er 145 kroner per innbyggjar.
Også ei og anna bok må ein rekna med å finna under juletreet her i Nordhordland i jula. Dersom me reknar oss som gjennomsnittlege lesehestar, så går det over seks millionar kroner til bøker, blad og spel.
Like mykje går det til blomster og plantar.

Mjuke pakkar
SSB meiner at klesforretningar åleine vil omsetja for rett under fire milliardar kroner i Noreg i desember. Det er 60 prosent meir enn ein gjennomsnittleg månad elles i året. Også Nordhordland-folket handlar mjuke pakkar til jul. I gjennomsnitt brukar kvar av oss 865 kroner på klede no i desember, noko som betyr ei klesomsetning på heile 27 millionar kroner for oss Nordhordland-bebuarar, utan at det nødvendigvis betyr at handlinga skjer i våre kommunar.
Butikkar som sel fjernsyn, radio og DVD-spelarar doblar omsetninga no i desember, og me brukar denne månaden 23 millionar kroner på slike elektroniske artiklar. Totalt brukar den norske befolkninga over 40 milliardar kroner (inkl. moms) no i desember.

Forventa forbruk i Nordhordland i desember
Utvalde varer, kjelde: SSB

Mat og drikke        109.759.000 kr
Per innbyggjar        3.463 kr

Vin og brennevin    13.787.325 kr
Per innbyggjar        435 kr

Smykkar o.l        4.595.000 kr
Per innbyggjar        145 kr    

Bøker                              6.085.000 kr
Per innbyggjar        192 kr        

Klede            27.416.000 kr
Per innbyggjar        865 kr

TV, elektrisk        22.630.000 kr
Per innbyggjar        714 kr

Totalt            277.014.000 kr
Per innbyggjar        8.740 kr

Forventa forbruk i desember,
per kommune
Lindås            118.322.000 kr
Meland              52.160.000 kr
Radøy              40.632.000 kr
Austrheim           21.902.000 kr
Gulen              21.019.000 kr
Masfjorden           14.421.000 kr
Fedje                 5.506.000 kr
Modalen                   3.050.000 kr