Kaland-området kan få nytt løft

Arbeidet med å laga ny trafikkløysing ved Mongstadkrysset startar opp i februar neste år og skal vera ferdig neste haust. Det vert snakk om ei rundkøyring, gangveg til Kaland og undergang under riksvegen, opplyser ordførar Ole Lysø.

? Målet er å få fleire bedrifter til å etablera seg i området og å gje dei som bur i Austrheim eit betre tilbod, seier ordføraren.

Han håpar og at fleire vil busetja seg i Kaland-området når tilbodet i nærområdet vert styrkja.

Dekkast av bompengar

Trafikkløysinga vert i første omgang forskottert av Austrheim kommune, Statens Vegvesen og Statoil. Men meininga er at det skal dekkast av bompengar dersom dette kjem på plass. Dersom ikkje må dei tre aktørane dekka kostnadene, fortel Lysø.

Rundkøyringa vil gjera området på vestsida av riksvegen lettare tilgjengeleg, og dermed vil det løysa ut eit større næringsareal på vel 180 mål. Det var eit folkemøte om saka i regi av Austrheim kommune i går kveld. På møtet vart planane presenterte for næringslivet og andre interesserte.

Servicenæringar

Det er snakk om eit område for servicenæringar, kontor og liknande, fortel Solveig Lerøy i Mongstad Næringshage. Ein får då eit område for tungindustri på Mongstad nede mot sjøen og lettare industri oppe mot vegen. På andre sida av vegen vert det altså snakk om fleire kontor, servicenæringar og liknande. Når undergangen kjem på plass vil det også vera lettare å kryssa riksvegen til fots.

Området er eigd av private grunneigarar, og desse skal vera villige til å selja areal, fortel Ole Lysø. Området er alt regulert som næringsareal og det er også eit par bedrifter som alt er etablert der. Lysø fortel dessutan at kommunen har vorte kontakta av fleire interesserte bedrifter, utan at det er gjort konkrete avtalar endå. Han seier og at andre interesserte gjerne må kontakta kommunen.